काठमाडौं । नेपाली यु–१९ पुरुष राष्ट्रिय क्रिकेट टोलीले भारतीय टोली दिल्ली यु–१९ सँग द्विपक्षीय क्रिकेट सिरिज खेल्ने भएको छ ।
नेपालमा आउँदो अप्रिलमा हुने आईसीसी यू–१९ विश्वकप एसिया छनोट प्रतियोगिताको तयारीस्वरूप सिरिज हुन लागेको हो ।
सिरिज यही चैत १२ देखि १६ गतेसम्म पर्साको वीरगञ्जस्थित नारायणी क्रिकेट रंगशालामा आयोजना हुनेछ ।
नेपाल क्रिकेट संघ (क्यान)ले जारी गरेको तालिकाअनुसार पहिलो खेल चैत १२ मा हुनेछ भने दोस्रो खेल १४ र तेस्रो खेल १६ गते हुनेछ ।
साथसाथै, नेपाली यु–१९ टोलीले एसिया छनोटअघि नै अफगानिस्तान यु–१९ टोलीसँग पनि तीन खेलको शृंखला खेल्ने तय भइसकेको छ । क्यानले जारी गरेको वार्षिक क्यालेण्डरमा यसबारे उल्लेख गरिएको छ ।
