काठमाडौं। नेपालका लागि अमेरिकी राजदूतावासले अवैध आप्रवासनको जोखिमबारे चेतावनी दिँदै नेपाली नागरिकलाई सतर्क रहन आह्वान गरेको छ।
शुक्रवार राजदूतावासद्धारा प्रकाशित एक सूचनामा अमेरिकी विदेशमन्त्री मार्को रुबियोलाई उद्धृत गर्दै भनिएको छ “अवैध आप्रवासन रोक्न र अमेरिकाको सीमा सुरक्षालाई बलियो बनाउन हाम्रो प्रतिबद्धता अटल छौ ।”
अमेरिकाबाट निस्कासनमा परेका १० नेपालीहरुलाई विहीवार काठमाडौं ल्याएर बुझाएको भोलिपल्ट राजदूताबासले सूचना जारी गरेको छ । राजदूतावासका अनुसार धेरै नेपालीहरूले अमेरिकामा बस्न र काम गर्न सपना देख्छन्, तर केही एजेन्टहरूको झूटा आश्वासनमा पर्न जाँदा उनीहरूले जीवन र पैसा जोखिममा पार्ने गरेका छन्।
हरेक वर्ष, धेरैले रोजगारीका अवसरहरू र भिसाको झूटा वाचा गर्ने एजेन्टहरूलाई विश्वास गरेर आफ्नो जीवन र बचत (पैसा) जोखिममा पार्छन्’ दुताबासले भनेको छ, ‘धेरैले बाटोमा नजरबन्द, निर्वासन, आपराधिक दण्ड, वा जीवनका धम्कीपूर्ण जोखिमहरूको सामना गर्छन्। आफूलाई र आफ्ना प्रियजनहरूलाई सुरक्षित राख्नुहोस् । जोखिम नलिनुहोस्’।
