घोराही। घोराहीमा चौथो खुमबहादुर खड्का स्मृति लुम्बिनी प्रदेशस्तरीय खुला पुरुष भलिबल प्रतियोगिताको दोस्रो दिन भएको खेलमा रोयल सिस्ने क्लब, न्यु होराईजन क्लब र मणिमुकुन्द भलिबल क्लब विजयी भएका छन् ।

जिल्ला समन्वय समितिको मञ्चमा मंगलबारदेखि जारीे प्रतियोगितामा बुधबार भएका पाँच खेलमा रोयल सिस्नेले लगातार दुई खेल जित्दा गोरखा स्कुल, न्यु होराईजन र मणिमुकुन्द भलिबल क्लबले एक÷एक खेलमा जीत हासिल गरेका छन् ।प्रतियोगिता अन्तरगत बुधबार बिहान भएको पहिलो खेलमा रोयल सिस्नेले मणिमुकुन्द भलिबल क्लबलाई २६–२४ र २५–१८ को सोझो सेटमा हरायो ।

यसैगरी बुधवारको दोश्रो खेलमा न्यु होराईजन क्लबले गोरखा माविलाई २५–१० र २५–१७ को सोझो सेट र तैश्रो खेलमा रोयल सिस्ने क्लबले दाङ सोसाईटी क्लबलाई २५–२० र २५–२१ को सोझो सेटमा हराएको थियो ।

प्रतियोगिताअन्तर्गत दिउँसो भएको पहिलो खेलमा गोरखा माविले दंगीशरण गाउँपालिकालाई २५–१६ र २५ १८ को सोझो सेटमा हराउँदा प्रतियोगिताको बुधवारको अन्तिम र प्रतियोगिताको सातौँ खेल भने निकै रोमाञ्चक बन्यो । २–१ को सोटमा मणिमुकुन्दले दाङ सोसाईटी क्लबलाई हराएको थियो ।

जसमा पहिलो सेट मणिमुकुन्दले २५–१८ मा जित्दा दोस्रो सेटमा भने दाङ सोसाईटीले नाटकीय ढंगले आफ्नो पक्षमा पार्यो । १५–२३ को स्थितीमा रहेको नतिजालाई उल्टाउँदै दाङ सोसाईटीले लगातार १० अंक जोड्दै २५–२३ का साथ जित्यो । तर तेस्रो सेटमा मणिमुकुन्दले अवसर गुमाएन । उसले १५–१० को नतिजा निकाल्दै २–१ को सेटमा जित हासिल गरेको छ ।

योसँगै जारी प्रतियोगितामा मणिमुकुन्दले अर्को चरणको सम्भावना जिविदै राखेको छ भने दाङ सोसाईटी प्रतियोगिताबाट बाहिरिएको छ । आठ टिम सहभागी प्रतियोगितामा दुई समुह विभाजन गरी लिग चरणमा खेल भईरहेको नेपाली कांग्रेस दाङका सहसचिव एवं खुमबहादुर खड्का समाज विकास समितिका संयोजक राजु आचार्यले जानकारी दिएका छन् ।

प्रतियोगिता अन्तरगत बिहीबार पनि पाँच खेल हुने छन् । फागुनको २४ गतेसम्म सञ्चालन हुने प्रतियोगितामा प्रथम हुने टिमले नगद दुई लाख ५१ हजार रुपैयाँसहित शिल्ड, मेडल र प्रमाणपत्र प्राप्त गर्नेछ । दोस्रो हुने टिमले नगद एक लाख २५ हजार र तेस्रो हुने टिमले नगद ५० हजारसहित शिल्ड, मेडल र प्रमाणपत्र प्राप्त गर्नेछ ।