कञ्चनपुर । महाकाली नदीमा बेपत्ता भएका सशस्त्र प्रहरीका सहायक निरीक्षक (असई) सागरराज थारुको शव पाँच दिनपछि फेला परेको छ ।
गत शनिबार दोधारा–चाँदनी झोलुङ्गे पुलसँगै चुँडिएको नेपाल टेलिकमको इन्टरनेट तार तान्ने क्रममा बोट अनियन्त्रित भएपछि थारु महाकाली नदीमा बेपत्ता हुनुभएको थियो ।
बेपत्ता भएलगत्तै खोजीमा खटिएको सशस्त्र प्रहरीको गोताखोर टोलीले लगातार पाँच दिनसम्म खोजी गरेपछि आज उहाँको शव फेला पारेको हो । जिल्ला प्रहरी कार्यालय कञ्चनपुरका प्रहरी नायब उपरीक्षक टेकबहादुर रावतका अनुसार थारुको शव बेपत्ता भएको स्थानबाट करिब १० देखि १५ मिटर दक्षिणतर्फ अड्किएको अवस्थामा फेला परेको हो ।
शव परीक्षणपछि परिवारको जिम्मा लगाइने प्रहरी नायब उपरीक्षक रावतले जानकारी दिनुभयो ।
बर्दियाको ठाकुरबाबा नगरपालिका–६ निवासी थारु बेपत्ता हुनुभन्दा अघिल्लो दिन मात्रै दोधारा–चाँदनीस्थित सशस्त्र प्रहरीको सीमासुरक्षा गुल्ममा हाजिर हुनुभएको थियो ।
दुई साताअघि दोधारा–चाँदनी जोड्ने झोलुङ्गे पुल भत्किएको थियो । पुल भत्किने क्रममा नेपाल टेलिकमको इन्टरनेट तारसमेत चुँडिएपछि उक्त तार तान्ने क्रममा थारु नदीमा बेपत्ता हुनुभएको थियो ।
