इस्लामाबाद । पाकिस्तानको इमरान खान सरकारले देशको इतिहासमा पहिलो पटक राष्ट्रिय सुरक्षा नीति जारी गरेको छ । सुरक्षा नीतिमा इमरान खान सरकारले भारतसँग राम्रो सम्बन्धको आशा व्यक्त गरेको छ । साथै जम्मू–कश्मीरलाई द्विपक्षीय सम्बन्धको मुख्य मुद्दाका रूपमा वर्णन गरिएको छ। सुरक्षा नीतिमा पाकिस्तानले हिन्दुत्वमा आधारित राजनीति पाकिस्तानको सुरक्षाका लागि चिन्ताको विषय भएको र त्यसले असर गरिरहेको पनि बताएको छ ।
सुरक्षा नीतिमा भारत र कश्मीरको धेरै पटक उल्लेख गरिएको छ। पाकिस्तानले कश्मीर मुद्दाको न्यायपूर्ण र शान्तिपूर्ण समाधान नभएसम्म यो द्विपक्षीय सम्बन्धको आधारशिला रहने बताएको छ। उक्त दस्तावेजले चीनसँग राम्रो सम्बन्ध कायम राख्नमा पनि जोड दिएको छ । यसले चीन–पाकिस्तान आर्थिक करिडोरलाई पाकिस्तानका लागि राष्ट्रिय महत्वको परियोजनाका रूपमा वर्णन गरेको छ। इमरान खान सरकारले रुससँग पनि राम्रो सम्बन्ध बनाउन चाहेको छ । पाकिस्तानले अमेरिकासँगको सहकार्यको लामो इतिहास रहेको बताएको छ । पाकिस्तान कुनै पनि शिविरको राजनीतिको हिस्सा बन्न चाहँदैन। सुरक्षा नीतिमा पाकिस्तान अमेरिकासँग बृहत् सम्बन्ध राख्न चाहन्छ भन्ने उल्लेख गरिएको छ ।
यसैबीच भारतका लागि पाकिस्तानका पूर्व राजदूत अब्दुल बासितले ट्विट गर्दै इमरान खान सरकारमाथि ठूलो हमला गरेका छन् । अब्दुल बासितले ट्वीट गर्दै भनेका छन्, “पाकिस्तानको राष्ट्रिय सुरक्षा नीतिले भारतसँग वार्ता र व्यापारको सुझाव दिनुपर्छ, त्यो पनि त्यतिबेला मात्र जतिबेला भारत कश्मीरमा सम्झौता गर्न तयार छैन। म भन्न चाहन्छु कि यो एक ठूलो गल्ती हुनेछ।” यसले पाकिस्तानको कश्मीर नीतिलाई कमजोर बनाउन सक्ने उनले बताए । एजेन्सी
