काठमाडौँ। नेपाली सेनाका विभिन्न विभाग, महानिर्देशनालय, निर्देशनालयका प्रमुखहरू तथा पृतनापतिहरूको समन्वयात्मक बैठक सुरु भएको छ।
बैठकलाई सम्बोधन गर्दै रक्षा मन्त्री राईले राष्ट्र सेवाप्रति अविचलित समर्पणका क्रममा नेपाली सेनाले देखाएको दक्षता उल्लेखनीय रहेको बताउनुभयो। उहाँले नेपाली सेना नेपाली जनताको आस्था र भरोसाको धरोहरको रूपमा स्थापित भइसकेको धारणा व्यक्त गर्नुभयो। साथै, उहाँले बदलिँदो भू(राजनीतिक परिवेश, ध्रुवीकरण, जलवायु परिवर्तनका चुनौतीहरू तथा प्रविधि र कृत्रिम बौद्धिकताका कारण उत्पन्न हुनसक्ने जोखिमहरूप्रति नेपाली सेना सचेत रहनुपर्ने आवश्यकता औंल्याउनुभयो।
कार्यक्रममा स्वागत मन्तव्य राख्दै प्रधान सेनापति अशोक राज सिग्देलले नेपालको संविधानले निर्दिष्ट गरेका जिम्मेवारी तथा राष्ट्रिय सुरक्षा नीतिले औंल्याएका कार्यहरू सम्पादन गर्न नेपाली सेना सदैव प्रतिबद्ध रहेको बताउनुभयो। उहाँले वर्तमान विश्व सुरक्षा अवस्था बहु(आयामिक दृष्टिकोणले थप संवेदनशील, जटिल र अन्योलपूर्ण बन्दै गएको उल्लेख गर्दै आन्तरिक तथा बाह्य सुरक्षा चुनौतीहरू सामना गर्न रणनीतिक समन्वय आवश्यक रहेको बताउनुभयो।
प्रधान सेनापतिले सुरक्षा चुनौतीहरूको प्रभावकारी व्यवस्थापनका लागि विभिन्न रणनीति तथा समन्वय प्रणालीलाई समयानुकूल परिमार्जन गर्दै अघि बढ्नुपर्ने आवश्यकता औंल्याउनुभयो। बैठकका सहभागीहरूले आ(आफ्नो कार्यक्षेत्रको वस्तुस्थिति समीक्षा गर्दै आगामी रणनीतिहरूका लागि आवश्यक सुझावहरू प्रस्तुत गर्ने कार्यक्रम रहेको छ।
उक्त बैठकमा बलाधिकृत, बलाध्यक्ष, रथीवृन्द, निमित्त रक्षा सचिव तथा रक्षा मन्त्रालय र नेपाली सेनाका उच्च अधिकृतहरूको उपस्थिति रहेको छ। बैठक दुई दिन सम्म संञ्चालन हुने छ ।
