ढाका । बङ्गलादेशले गत हप्ता कोभिड–१९ सङ्क्रमणमा तीव्र वृद्धिलाई रोक्न नियम र दिशानिर्देशहरूको नयाँ सेट लागू गरेको छ। स्वास्थ्य सेवा महानिर्देशनालयद्वारा जारी गरिएको दैनिक बुलेटिन अनुसार बङ्गलादेशमा बिहीबार तीन हजार ३५९ नयाँ केस र १२ कोभिड–सम्बन्धित मृत्यु रिपोर्ट गरेको छ । कोरोना पोजिटिभ केस १२ प्रतिशतले वृद्धि भएको छ ।
महानिर्देशनालयले राजधानी ढाका र दक्षिणपूर्वी जिल्ला रङ्गमतीलाई ‘रेड जोन’ घोषणा गरेको । यी जिल्लामा सङ्क्रमण दर १० प्रतिशतदेखि १९ प्रतिशतको बीचमा रहेको बताइएको छ।
“हामीले कोभिड–१९ मामिलामा एकदमै तीव्र वृद्धि देखिरहेका छौँ। दैनिक सकारात्मकता दर अहिले विगत तीन दिनमा १० प्रतिशत नाघेको छ”, महानिर्देशनालयका प्रवक्ता डा रोबेद अमीनले अल जजीरालाई भने।
अमीनले बङ्गलादेशमा पत्ता लागेको कोभिड–१९ मा ८० प्रतिशतभन्दा बढी अझै पनि डेल्टा भेरियन्टका रहेको बताए। “यद्यपि ओमिक्रोन भेरियन्टका केसहरू बढ्दै गएका छन्”, उनले भने।
अठार करोड जनसङ्ख्या भएको बङ्गलादेशले जिम्बाब्वेमा एक शृङ्खला खेलेर आएका दुई महिला क्रिकेटरमा डिसेम्बरको दोस्रो सातामा पहिलो ओमिक्रोन केस भएको पुष्टि गरेको थियो ।
पछिल्लो तथ्याङ्कअनुसार कोभिड–१९ सङ्क्रमणबाट यो मुलुकमा कुल २८ हजार १२३ को मृत्यु भएको छ भने कुल सङ्क्रमित सङ्ख्या १६ लाख चार हजार ६४४ पुगेको छ । जनवरी १ मा बंगलादेशले २.४३ प्रतिशतको दैनिक सकारात्मकता दरका साथ ३७० केस फेला पारेको थियो।
“सङ्क्रमणको निरन्तर वृद्धिले ओमिक्रोन समुदायमा केही हदसम्म विस्तार भएको सङ्केत गरेको छ”, स्वास्थ्यमन्त्री जाहिद मलेकले बुधबार पत्रकार सम्मेलनमा बताए ।
