काठमाडौ । नेपाली भूमि लिपुलेक कालापानी क्षेत्रमा भारतले सार्वजनिक रुपमा सडक निर्माण गरिरहेको अभिव्यक्ति दिइरहँदा नेपाल सरकार र सत्तारूढ गठबन्धनको आश्चर्यजनक मौनता दु:खद र रहस्यमय भएको राष्ट्रिय प्रजातन्त्र पार्टी राप्रपाले जनाएको छ ।
राप्रपा महामन्त्री भुवन पाठकले एक बिज्ञप्ति जारी गर्दे नेपाली भूमिमा भइरहेको हस्तक्षेपका बारे नेपाल सरकारले भारतसंग कुटनैतिक र राजनीतिक तहमा संवाद गरि अविलम्ब निर्माण कार्य रोक्न र आफ्नो भूमिको रक्षा हुने गरि समाधान निकाल्न नेपाल सरकार समक्ष जोडदार माग गर्नुभएको छ ।
बिज्ञप्तिमा भनिएको छ- नेपाली भूमि लिपुलेक कालापानी क्षेत्रमा भारतले एकतर्फी रुपमा सडक निर्माण गरिरहेको र केही दिन अघि भारतीय प्रधानमन्त्री नरेन्द्र मोदीले सो कुराको खुलासा गर्नुभएको विषय गम्भीर, आपत्तिजनक र नेपाली सार्वभौमिकताको विरुद्धमा छ । कालापानी लिपुलेक नेपाली भूमि हो, आफ्नो भूमि माथि भइरहेको अतिक्रमण र हस्तक्षेपका विरुद्ध नेपाल सरकारले प्रतिवाद गर्नुपर्दछ।
