काठमाडौँ । महिला त्रिकोणात्मक टी–ट्वान्टी क्रिकेट सिरिज आज बिहीबारदेखि सुरु हुँदैछ । सिरिजको उद्घाटन खेलमा नेपालले नेदरल्याण्ड्ससँग खेल्दैछ ।
खेल आज मध्याह्न १२ः१५ बजेदेखि कीर्तिपुरस्थित त्रिवि क्रिकेट मैदानमा सुरु हुनेछ ।
आजदेखि सुरु हुने प्रतियोगितामा नेपाल र नेदरल्याण्ड्ससँगै थाइल्याण्डले पनि प्रतिस्पर्धा गर्दैछ । माघ २५ गतेसम्म सञ्चालन हुने शृङ्खलाका सबै खेलहरू कीर्तिपुरस्थित त्रिवि क्रिकेट मैदानमा हुने छन् ।
नेपाली राष्ट्रिय क्रिकेट टोलीकी कप्तान इन्दु बर्माले आफ्नो टोली सन्तुलित रहेकाले सिरिज जित्ने बताएकी छन् ।
प्रतियोगिताअगाडि बुधवार कप्तानसँग भएको पत्रकार सम्मेलनमा नेपाली टोलीकी कप्तान इन्दुले भर्खर प्रधानमन्त्री कप क्रिकेट खेलेका खेलाडी र यु–१९ विश्वकपमा राम्रो प्रदर्शन गरेका नेपालकी कप्तान पूजा महतोसँगै दुई खेलाडी रहेकाले आफ्नो टोली सन्तुलित रहेको बताइन् ।
पूर्ण सन्तुलित रहेको र उत्कृष्ट प्रदर्शन गर्दै उपाधि जित्ने उनको विश्वास छ ।
यस्तै, नेदरल्यान्ड्सकी कप्तान बेबेट्टे डी लिडेले नेपालमा क्रिकेट खेल्न आफूहरू उत्साहित रहेको प्रतिक्रिया दिइन् ।
