काठमाडौं । कोलम्बियाले आप्रवासीलाई देशनिकाला गरेर फिर्ता पठाइएका अमेरिकी विमानहरूलाई आफ्नो देशमा अवतरण गर्न नदिने भएको छ ।
अवैध आप्रवासी बोकेर गएका विमानलाई कोलम्बियाले अवतरण गर्न नदिएपछि अमेरिकी राष्ट्रपति डोनाल्ड ट्रम्पको कडा प्रतिक्रिया आएको छ । ट्रम्पले कोलम्बियामाथि व्यापार र वित्तीय प्रतिबन्ध लगाउने घोषणा गरेका छन् । आइतबार ट्रम्पले कोलम्बियामाथि नयाँ शुल्क र प्रतिबन्धहरू लगाउने घोषणा गरेका हुन् ।
अब अमेरिकाले कोलम्बियाली सामानहरूमाथि २५ प्रतिशत शुल्क लगाउने भएको छ । ट्रम्पले सामाजिक सञ्जालमार्फत घोषणा गर्दै अमेरिकाले कोलम्बियाबाट आउने सम्पूर्ण आयातमा तत्काल २५ प्रतिशत शुल्क लगाउने बताएका छन् । उनले एक हप्ताभित्र यसलाई ५० प्रतिशतसम्म पुर्याइने पनि बताएका छन् । लामो समयदेखि अमेरिका निकट रहेको ल्याटिन अमेरिकी देशमाथि यस्तो कदम चालिएको हो ।
ट्रम्प प्रशासनले कोलम्बियाविरुद्ध वित्तीय तथा बैंकिङ प्रतिबन्धहरू पनि पूर्ण रूपमा लागू गर्ने जनाएको छ । साथै, कोलम्बियाली सरकारी अधिकारीहरूको भिसा रद्द गर्ने र यात्रा प्रतिबन्ध लगाउने निर्णय गरिएको छ ।
कोलम्बियाका वामपन्थी राष्ट्रपति गुस्ताभो पेट्रोले पनि ट्रम्पको कदमको कडा विरोध जनाएका छन् । उनले अमेरिकी सामानहरूमाथि पनि २५ प्रतिशत प्रतिकारात्मक शुल्क लगाउने घोषणा गरेका छन् । अर्को सामाजिक सञ्जाल पोस्टमा उनले उक्त शुल्क ५० प्रतिशतसम्म पुर्याइने बताएका छन् ।
ट्रम्पले कोलम्बियाली आयातमा भारी शुल्क लगाउने कदम चालेपछि दुई देशबीचको व्यापारमा ठूलो असर पर्न सक्ने देखिएको छ । सन् २०२२ मा अमेरिका र कोलम्बियाबीचको व्यापार ५३ दशमलव ५ बिलियन डलर पुगेको थियो, जसमा अमेरिकाले ३ दशमलव ९ बिलियन डलर व्यापार लाभ लिएको थियो । कोलम्बियाबाट अमेरिकी बजारमा मुख्य रूपमा कच्चा तेल, कफी, फूलजस्ता उत्पादनहरू निर्यात गरिन्छ ।
