काठमाडौँ । लाजिम्पाटमा घरजग्गा व्यवसायी विक्रम लामामाथि आक्रमण गरेको आरोपमा प्रहरीले थप दुई जनालाई पक्राउ गरेको छ ।
रड आक्रमणमा संलग्न रही फरार भएका नुवाकोटको ककनी घर भएका ३३ वर्षीय अजय लामा र गोरखा घर भएका दीपक बरामुलाई पक्राउ गरिएको उपत्यका अपराध अनुसन्धान कार्यालयका एसएसपी सानुराम भट्टराईले जानकारी दिए । उनीहरूलाई भारतबाट पक्राउ गरी काठमाडौँ ल्याइएको प्रहरीले जनाएको छ ।
कार्तिक ११ मा लाजिम्पाट स्थित इनोभा अस्पतालको पार्किङमा नुवाकोटको ककनी गाउँपालिका–६ घर भएर टोखा नगरपालिका–३ स्थित ग्राण्डी बस्ने लामामाथि चार जनाको समूहले मार्ने उद्देश्यसहित आक्रमण गरेको थियो ।
आक्रमणमा संलग्न ७ जना विरुद्ध अदालतमा ज्यान मार्ने उद्योगमा मुद्दा दायर भएको छ । विक्रम लामाको पूर्व भाउजू लक्ष्मी राई, धादिङ घर भएका रमेश सिलवाल, गोरखा घर भएका सिजन अधिकारी, निश्चल सुनार, दीपक बरामु, नुवाकोट घर भएका शैलेन्द्र तामाङ उर्फ मार्सल र अजय लामालाई प्रतिवादी कायम गरिएको छ ।
