काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेमाथि राज्यले प्रतिशोध साधेर निरन्तर दमको शैली अपनाएको विपक्षी दलको बैठकले ठहर गरेको छ ।
बुधबार सिंहदरबारस्थित माओवादी संसदीय दलको कार्यालयमा बसेको प्रतिपक्षी दलहरूको बैठकले सो ठहर गरेको रास्वपा कार्यवाहक सभापति डीपी अर्यालले जानकारी दिए ।
सहकारीको विषयमा सत्तारुढ दल निकट रहेकाहरूलाई बिहान अदालत लगेर साँझ छाड्ने गरेको तर सभापति लामिछानेमाथि प्रतिशोध साधिएको ठहर गरिएको उनले बताए । उनले भने, ‘सहकारीको विषयमा कसैलाई बिहान अदालतमा ल्याएर साँझ छोडेको छ । सञ्चालकहरूलाई पनि त्यसरी छाडेको छ । रविजीमाथि यस किसिमको दमन व्यवहार राज्यको प्रतिशोध हो भन्ने बैठकको निष्कर्ष रह्यो’।
