काठमाडौँ । पूर्वराजा ज्ञानेन्द्र शाहले विदेशी भूमिका नीति र दर्शन नेपालीलाई नचाहिने बताउनु भएको छ ।
पृथ्वीनारायण शाहको जन्मजयन्तीका अवसरमा बिहीबार एक भिडियो सन्देश सार्वजनिक गर्दै उहाँले राष्ट्रनिर्माताका मार्गदर्शनलाई आत्मसात् गर्नसके नेपाललाई कसैले केही गर्ननसक्ने बताउनु भएको छ । उहाँले भन्नुभयो ‘हामी सुनको कमण्डलु बोकेर अरुसँग भिक्षा मागिरहेका छौँ ।’
सन्देशमा भनिएको छ -नेपालमा यतिबेला सुनको कमण्डलु थापेर अरुसँग भिख माग्दै सीपको दुरुपयोग गर्ने काम भइरहेको उनको भनाइ छ । हामी सुनको कमण्डलु बोकेर अरुसँग भिक्षा मागिरहेका छौँ ।
उहाँले भन्नुभएको छ- हामीमध्ये कतिपय दाजुभाइ दिदीबहिनी विदेशी भूमिका निर्मित वादमा किन भर परेका हुन् भन्ने प्रश्न गर्नुपर्ने बेला आएको छ ।
पूर्वराजा शाहले दिव्यउपदेशबाट नेपाललाई तीन शताब्दीअघि नै राष्ट्रवाद र आर्थिक सम्बृद्धिका धारणा प्राप्त भएको पनि उल्लेख गर्नुभएको छ ।
सन्देशमा भनिएको छ -राष्ट्रनिर्माताको स्मरण गर्दा हाम्रो ध्यान त्यता जानुपर्छ । समृद्धिको बाटो, अवलम्बन गर्नुपर्ने चनाखो वैदेशिक दृष्टिबारे राष्ट्रनिर्माताले स्पष्ट निर्देशन गरेको बाटोतर्फ हिँड्नुपर्छ, नेपाल कसैको रणमैदान होइन, शान्तिथलो बनाऊँ । साझा घर नेपाल, साझा थर नेपाली भन्ने विचार राख्दा नै राष्ट्रनिर्माताको आकांक्षा पूरा हून्छ भन्ने हाम्रो धारणा हो ।
उहाँले सबै नेपालीलाई सुखी र सन्तुष्ट राख्नु आवश्यक रहे पनि विश्वको व्यवस्थामा नेपाल कुन कुनामा छ भनी सोचनीय रहेको बताउनु भयो । उहाँले आवधिक निर्वाचन र स्वतन्त्रताले मात्र प्रजातन्त्रको मूल्य बोक्न नसक्ने तर राष्ट्रियता आमसुरक्षा र गासबाससहितको व्यवस्था नै पूर्णप्रजातन्त्र हुने जनाउनु भयो ।
