काठमाडौँ । स्वर्णलक्ष्मी बहुउद्देश्यीय सहकारीको बचत रकम अपचलन मुद्दामा संलग्न १३ जनाबारे थप अनुसन्धान गर्न सरकारी वकिलले प्रहरीलाई निर्द्शन दिएको छ ।
काठमाडौँ जिल्ला सरकारी वकिल कार्यालयले सहकारीको बचत अपचलनको आरोप लागे पनि प्रतिवादी नबनाएपछि नेपाली कांग्रेसकी सांसद माया राईसहितलाई थप अनुसन्धान गर्न निर्देशन दिएको हो । उनी स्वर्णलक्ष्मीको सहसचिव रहेकी थिइन् ।
जिल्ला प्रहरी परिसर काठमाडौंले ४४ जनाविरूद्ध मुद्दा चलाउन सिफारिस गरेको थियो। तर सरकारी वकिलको कार्यालय काठमाडौंले ३९ जनालाई प्रतिवादी बनाएर मुद्दा चलाएको थियो। अनुसन्धान प्रतिवेदनमा तिनपुस्ते यकिन विवरण नखुलेका राइसहित याम कुमार नाल्बो, सुरज श्रेष्ठ, पुनम कुमारी चालिसे, मिरा बम्जन र संजिव गिरी समेतलाई थप अनुसन्धान गर्न जिल्ला प्रहरी परिसर काठमाडौंलाई निर्देशन दिएको हो ।
यस्तै, ठुलो मात्रामा कर्जा रकम लिएर नतिर्ने शम्भु गुरागाईं, ओम प्रकाश गुरुङ, लक्ष्मी प्रसाद पौडेल, उमेश गुरुङ, दिपेश कुमार पुन, भिम बहादुर तामाङ र पुष्पा राईबारे पनि थप अनुसन्धान गर्न भनिएको छ ।
