काठमाडौं । सत्तारुढ दल नेकपा एमाले र प्रमुख प्रतिपक्षी दल नेकपा माओवादी केन्द्रको केन्द्रीय समितिको बैठक आज बस्दै छ । दुवै दलले काठमाडौंमा बस्ने गरी एकै दिन केन्द्रीय समिति बैठक बोलाएका हुन् ।
नेकपा एमालेको बैठक पार्टी कार्यालय च्यासलमा बिहान ११ बजे सुरु हुने छ । तयसैगरी माओवादी केन्द्रको बैठक दिउँसो १ बजे पार्टी कार्यालय पेरिसडाँडामा बस्ने छ ।
बैठकमा दुवै दलका अध्यक्षले राजनीतिक प्रतिवेदन पेश गर्नेछन् ।
माओवादीका केन्द्रका अध्यक्ष दाहालले आफ्नो प्रतिवेदनलाई ‘पार्टी रुपान्तरण र पुननिर्माणको सङ्कल्प : आजको आवश्यकता’ शीर्षक दिएका छन् ।
एमाले अध्यक्ष ओलीको राजनीतिक प्रतिवेदनमा नेपाली कांग्रेस र नेकपा एमालेबीचको सत्ता सहयात्राको उपलब्धि, सरकारले गर्न नसकेका काम, सुधारको आवश्यकता, आन्तरिक तथा वाह्य परिस्थितिलगायतको विश्लेषण गरिएको छ ।
यसैगरी प्रतिवेदनमा आगामी कार्ययोजना, पार्टी सङ्गठन सुदृढीकरण, वर्तमान सरकार गठन, यसअघिका सरकारमा साझेदारी, सरकारका प्राथमिकता, संविधान संशोधन, आर्थिक सुधार, सहकारीलगायत विषयसमेत समेटिएको छ ।
आज ओलीले प्रतिवेदन पेश गरेपछि केन्द्रीय सदस्यलाई प्रतिवेदनमाथि बेग्लाबेग्लै धारणा एमालेले मिलाएको छ ।
एमालेले यसअघि यस्ता प्रतिवेदनमाथि समूहगत छलफल गर्दै आएको थियो । अहिले छलफलका लागि प्रत्येक केन्द्रीय सदस्यलाई तीन मिनेटको समय उपलब्ध गराइएको छ ।
माओवादी केन्द्रमा पनि अध्यक्ष दाहालले पेश गरेको प्रतिवेदनमाथि आजैदेखि छलफल थालिने छ ।
केन्द्रीय समिति बैठक अघि माओवादी केन्द्रको स्थायी कमिटीको बैठक बिहान ८ बजे बस्दै छ ।
दुवै दलले दुई दिनभित्र केन्द्रीय समिति बैठक सक्ने तयारी गरेका छन् । अध्यक्ष ओलीको नेतृत्वमा सरकार बनेपछि बस्न लागेको एमालेको पहिलो केन्द्रीय समिति बैठक हो ।
बैठकमा केन्द्रीय सदस्य र आयोगका प्रमुखलगायत सहभागी हुनेछन् ।
गत १८ पुसमा एमाले सचिवालय बैठकले बैठकमा प्रस्तुत हुने राजनीतिक प्रतिवेदन पारित गरेको थियो ।
संसद्को हिउँदे अधिवेशनको पूर्वसन्ध्यामा बस्न लागेको बैठकले संविधान संशोधनलगायतका ‘एजेण्डा’मा ठोस धारणा तय गर्ने नेताहरूले बताएका छन् ।
उता, माओवादी केन्द्रको बैठकमा ४ सय ९ पूर्ण केन्द्रीय सदस्य, दुई सय पाँच वैकल्पिक केन्द्रीय सदस्य, तीन आयोगबाट ७५ तथा सात भौगोलिक र तीन गैरभौगोलिक गरी १० प्रदेशका पदाधिकारीको सहभागीता हुने बताइएको छ ।
