एजेन्सी । भारत र अस्ट्रेलियाबीच सिड्नीमा भइरहेको पाँचौं टेस्टमा रोहित शर्माले खेलिरहेका छैनन् । रोहित प्लेइङ इलेभेनमा नभएपछि धेरै प्रश्न उठेका थिए । रोहितले शनिबार स्टार स्पोर्ट्ससँग कुरा गर्दै भने, ‘मैले सन्यास लिएको छैन ।’
रोहितले सिड्नी टेस्टमा खराब फर्मका कारण आफू नखेलेको बताए । ‘यो निर्णय लिन गाह्रो थियो, तर यो टोलीको हितमा लिइएको थियो । टोलीमा कसलाई रहने वा नराख्ने भन्ने हाम्रो निर्णय हो । अरू कसैले निर्णय गर्न सक्दैन ।’ उनले भने ।
रोहितले थप भने ‘माइक, पेन वा ल्यापटप बोकेर मान्छेको बोलीले जिन्दगी बदलिदैन । मैले कहिले सन्यास लिने, कहिले बाहिर बस्ने, कहिले कप्तानी लिने भन्ने कुरा उनीहरूले तय गर्न सक्दैनन् । म एक समझदार मान्छे, दुई छोराछोरीको बुबा हुँ । त्यसैले मलाई थाहा छ कहिले के गर्ने भनेर ।’
जसप्रित बुमराहले सिड्नी टेस्टमा भारतको कप्तानी गरिरहेका छन् । यस खेलमा रोहितको स्थानमा शुभमन गिलले मौका पाएका छन् ।
भारतीय कप्तान रोहित शर्मा बोर्डर–गावस्कर ट्रफीमा फ्लप भएका छन् । उनले ३ टेस्टको ५ इनिङ्समा ३१ रन मात्र बनाउन सके । उनको औसत ६.२० रहेको छ । २०२४ मा उनले २४.७६ को औसतमा १३१ रन मात्र बनाउन सकेका थिए ।
