काठमाडौं । दक्षिण कोरियाको मुआन अन्तर्राष्ट्रिय विमानस्थलमा भएको विमान दुर्घटनामा १७९ जनाको मृत्यु भएको छ ।
१ सय ८१ जना सवार विमानबाट दुई जनाकोे भने जीवितै उद्धार गरिएको छ । उनीहरु एक जना चालक दलका सदस्य र एक जना यात्रु हुन् ।उनीहरुको उपचार मोकपो अस्पतालमा भइरहेको छ ।
उनीहरुबाहेक विमानमा सवार सबैजनाको मृत्यु भएको योनहाप समाचार एजेन्सीले जनाएको छ ।
थाइल्याण्डको बैंककबाट आएको जेजु एयरको विमान ल्याण्ड गर्ने बेला धावनमार्गमा चिप्लिएर दुर्घटना भएको थियो । त्यसलगत्तै विमानमा आगो लागेको थियो ।
विमानमा चालक दलका ६ सदस्यसहित १८१ जना थिए । उनीहरुमध्ये दुई जना थाइल्याण्डका र अरु सबै दक्षिण कोरियाका थिए ।
