काठमाडौं । आज मंगलबार नेकपा सचिवालय बैठक बस्दै छ । सरकार पुनर्गठन, संवैधानिक अंगमा रिक्त पदाधिकारी नियुक्ति, पार्टी एकताका बाँकी काम टुंगो लगाउने विषयमा बैठकमा छलफल हुने नेकपा सचिवालय सदस्य एवं प्रवक्ता नारायणकाजी श्रेष्ठले जानकारी दिए ।
यसअघि, शनिबार र आइतबारका लागि बैठक तय भएको थियो । तर, कोरोना भाइरस संक्रमणका कारण देखाउँदै बैठक स्थगित भएको थियो । प्रधानमन्त्री एवं नेकपा अध्यक्ष ओलीको सल्लाहकार, सचिवालय कर्मचारीका साथै सुरक्षामा खटेका सुरक्षाकर्मीसहित ७० भन्दा बढीमा कोरोना संक्रणमा पुष्टि भएपछि बैठक स्थगित भएको थियो ।
सल्लाहकार, सचिवालय तथा सुरक्षाकर्मीमा कोरोना संक्रमण देखिएपछि प्रधानमन्त्री ओलीले सबै भेटघाट बन्द गरेका थिए । तर, आइतबार ओली र दाहालबीच भएको छलफलपश्चात बैठक बोलाउने सहमति भएको हो ।
प्रधानमन्त्री ओलीले गत बिहीबारको मन्त्रिपरिषद् बैठकबाट मुख्यसचिव, राजदूत नियुक्तिबारे गरेको निर्णयमा परामर्श नगरेको भन्दै अर्का अध्यक्ष दाहाल, वरिष्ठ नेताद्वय झलनाथ खनाल, माधवकुमार नेपालसहितका नेता असन्तुष्ट छन् । सो नियुक्ति विषयमा समेत बैठकमा छलफल गर्ने बताइएको थियो । राजधानी दैनिक
