मोरङ । मोरङको धनपालथान–३ मा रहेका उमा–गौरी कृषि सहकारीको रकम अपचलन गरेको आरोपमा संघीय संसद्को सार्वजनिक लेखा समिति सभापति ऋषिकेश पोखरेलकी श्रीमती अञ्जला कोइरालासहित २६ जनाविरुद्ध मुद्दा दायर भएको छ । उनीहरूविरुद्ध २२ करोड ४८ लाख २७ हजार ७ सय रुपैयाँ बिगो र ६ देखि ८ वर्षसम्म कैद मागदाबी गरेर जिल्ला अदालतमा मुद्दा चलाइएको हो ।
विराटनगर महानगरपालिका–४ की योगिता शर्मा बाँस्तोलालगायत २० जनाको जाहेरीका आधार प्रहरीले उमा–गौरी सहकारीको रकम अपचलनका विषयमा अनुसन्धान गरेको थियो । अभियुक्त २६ जनामध्ये सहकारीका सञ्चालक समिति सदस्य रोशन राजवंशी यसअघि नै पक्राउ परेका थिए ।
प्रहरी अनुसन्धान सकिएपछि सञ्चालक समिति सदस्य राजवंशीबाहेकका २५ जनालाई फरार प्रतिवादी बनाएर मुद्दा दायर गरिएको हो । मुद्दामा फरार प्रतिवादीका रूपमा सहकारीका अध्यक्ष शम्भुप्रसाद रौनियार, उपाध्यक्ष लक्ष्मण साह, सचिव आलम अन्सारी मियाँ र कोषाध्यक्ष शम्भुप्रसाद सिंह छन् । सञ्चालक समिति सदस्य आमोद मण्डल र जितमान ठाकुर, लेखा समितिका संयोजक विजयकुमार यादव तथा सदस्यहरू सुरेन्द्रकुमार राजवंशी र अशोककुमार विश्वासलगायत विरुद्ध पनि मुद्दा चलाइएको छ ।
लेखा समितिका सभापति ऋषिकेश पोखरेलकी पत्नी अञ्जला सहकारीकी पूर्वसञ्चालक हुन् । उनी सहकारीमा २०७२ देखि २०७८ सम्म सञ्चालक समिति सदस्य थिइन् । उनी सदस्य रहेकै बेला ऋणी र सञ्चालक समिति सदस्यको जग्गाको कागजपत्र धितो राखेर बुटवलको आरएसडीसी लघुवित्तसहित विभिन्न बैंकबाट ११ करोड ५६ लाख रुपैयाँ ऋण निकालिएको थियो ।
१८ करोड ४० लाख कुल पुँजी देखाइएको सहकारीको वासलात रिपोर्टमा १७ करोड ८७ लाख ४२ हजार कर्जा तथा सापट लगानी रहेको देखाइएको छ । सहकारीले बचतकर्ताको २ करोड ३ लाख ५४ हजार फिर्ता गर्न सकेको देखिँदैन । सहकारीमा ५ हजार सेयर सदस्य छन् । सहकारी संकटमा परेपछि कोइरालाले २०७८ माघ ५ मा राजीनामा दिएकी थिइन् ।
सहकारीले आरएसडीसीबाट २०७७ असोज २३ मा निर्णय गरेरै २०७७ फागुन १३ मा २ करोड रुपैयाँ र २०७८ असार २४ मा ७५ लाख रुपैयाँ कर्जा लिएको थियो । कर्जा लिने निर्णय गर्दाका तीन वटै बैठकमा संस्थाका अध्यक्ष रौनियार, उपाध्यक्ष दिलमाया राई, कोषाध्यक्ष शम्भुप्रसाद सिंह, सचिव आलम अन्सारी मियाँ तथा सञ्चालकहरू अञ्जला कोइराला तथा आमोद मण्डल र रोशन राजवंशी उपस्थित थिए । उनीहरूको हस्ताक्षरसहितको कागजात आरएसडीसीले अदालतमा पेस गरिसकेको छ ।
