एजेन्सी । अल्लु अर्जुनको फिल्म ‘पुष्पा २’ ले रिलिजको दुई दिनमा विश्वभर करिब ४१५ करोड रुपैयाँ कमाएको छ ।
योसँगै भारतीय बक्स अफिसमा फिल्मको कलेक्सन २६५ करोड रहेको छ । इन्डस्ट्री ट्र्याकर सकनिल्कका अनुसार ‘पुष्पा २’ ले हिन्दी संस्करणबाट करिब १३१ करोड रुपैयाँ कमाएको छ ।
यस हिसाबले फिल्मले विश्वव्यापी कमाईको मामिलामा शाहरुख खानको ‘जवान’ र एसएस राजामौलीको फिल्म ‘आरआरआर’लाई पछाडि छोडेको छ ।
आरआरआरले दुई दिनमा विश्वभर ३७१.५३ करोड रुपैयाँ कमाएको थियो । फिल्म जवानको कुरा गर्ने हो भने दुई दिनमा विश्वभर २३९.४७ करोड कमाएको थियो ।
व्यापार विज्ञ तरण आदर्शका अनुसार ‘पुष्पा २’ ले शुक्रबार हिन्दी संस्करणमा मात्रै ५० करोडभन्दा बढी कमाएको छ ।
फिल्म ‘पुष्पा २’ को ओपनिङ डे कलेक्सनको कुरा गर्दा विश्वभर २९४ करोड कमाएको थियो । जसमा भारतीय बक्स अफिसमा फिल्मको कलेक्सन १७५.१ करोड थियो । पुष्पा–२ ले हिन्दी संस्करणमा ७२ करोड कमाएको थियो ।
‘पुष्पा–२’ तमिल, तेलुगु, मलयालम, कन्नड र हिन्दी गरी ५ भाषामा रिलिज भएको छ । फिल्ममा अल्लु अर्जुन फेरि पुष्पराजको भूमिकामा देखिएका छन् । रश्मिका मन्दना पनि श्रीवल्लीको अवतारमा देखिएकी छिन् । यस्तै फहाद फासिल प्रहरी भनवर सिंह शेखावतको भूमिकामा छन् ।
फिल्मको लेखन र निर्देशन सुकुमारले नै गरेका छन् ।
