काठमाडौं । सत्तारूढ नेकपाकी सांसद सानु शिवाको निधन भएको छ। सिनामंगलस्थित नेपाल मेडिकल कलेजमा उपचार क्रममा बुधबार निधन भएको अस्पतालले जनाएको छ।
मुटुको समस्या भएकी साँसद शिवाको दुवै मिर्गौलाले २०६२/६३ देखि काम गर्न छाडेका थिए। उनले भारतमा पुगेर मिर्गौला प्रत्यारोपण गराएकी थिइन्।
इलामबाट समानुपातिकतर्फ प्रतिनिधि सभा सदस्य निर्वाचित भएकी शिवाको पाठेघरमा ट्युमर देखिएपछि शल्यक्रिया समेत गराएकी थिइन्। पछिल्लो समय उनको मुटुमा भल्भ राखिएको थियो।
शिवा जनवादी गीत गाउँदै राजनीतिमा लागेकी थिइन्। दलित महिलाको उत्थान तथा लैङ्गिक विभेदविरूद्ध शिवाले आवाज उठाउँदै आएकी थिइन्। उनको जन्म ताप्लेजुङको फुङलिङमा भएको थियो।
