काठमाडाैंः राजश्व अनुसन्धान विभागले भन्सार चोरी पैठारी गरेका मालवस्तुहरुको भुक्तानीका लागि गैर कानूनी रुपमा विदेशी मुद्रा विदेश पठाई विदेशी विनिमय अपचलन गर्ने जे.एस.एस. मोबाईल कलेक्सन एण्ड सर्भिसेज प्रा.लि. र श्याम इम्पेक्सका संचालक मोहन वंशल र गोविन्द वंशललाई रु. ८५ कराेड ९५ लाख २२ हजार ७२७ विगो असुल उपर गरी विगोको तीन गुणासम्म जरिवाना र ३ वर्षसम्म कैद साजय समेत मागदावी गरी काठमाण्डौ जिल्ला अदालतमा मुद्दा दर्ता गरिएको जनाएकाे छ।
विभागले जे.एस.एस. र श्याम इम्पेक्सका संचालकहरु मोहन वंशल र गोविन्द वंशलले विदेशमा निर्मित मोवाईल, मेमोरी कार्ड लगायतका मालवस्तुहरु पटक पटक भन्सार नतिरी चोरी पैठारी गरि अवैध रुपमा ल्याई बिक्री बितरण गरेको जनाएकाे छ ।
निकासी पैठारी गर्ने फर्मले मालवस्तुको निकासी वा पैठारी गर्दा अनिवार्य भन्सार विन्दुमा मालवस्तुको घोषणा गर्ने र लाग्ने महशुल भुक्तानी गरी निकासी/पैठारी गर्नुपर्ने कानूनी व्यवस्थाको विपरीत कार्य गरेको पनि विभागकाे भनाइ छ ।
यस्ता मालवस्तु तेश्रो मुलुकबाट नेपाल सरहदभित्र ल्याउँदा विदेशी मुद्रा भुक्तानी नगरी ल्याउन नसकिने देखिँदा ठुलो मात्रामा विदेशी मुद्रा गैरकानुनी तवरले विदेश पठाई विदेशी विनिमय अपचलन गरेको विभागकाे अनुसन्धानबाट खुलेकाे छ ।
विभागले दुबै फर्ममाथि विदेशी विनिमय (नियमित गर्ने) ऐन, २०१९ को दफा १७(१) बमोजिम असुल उपर गर्न र निज प्रतिवादीहरुलाइ विदेशी विनिमय (नियमित गर्ने) ऐन, २०१९ को दफा १७ (१), वमोजिम वीगोको तीन गुणासम्म सजाय र दफा १७(८) र तथा १७(९) बमोजिम ३ वर्षसम्म कैद सजाय समेत हुन माग दावी गरी काठमाण्डौ जिल्ला अदालतमा मुद्दा दायर गरिएको जनाएकाे छ ।
