काठमाडौँ । नेपाल प्रिमियर लिग (एनपिएल)को सातौँ खेलमा विराटनगर किंग्सले जित निकालेको छ ।
भर्खरै सम्पन्न खेलमा विराटनगरले लुम्बिनी लायन्सलाई २ विकेटले हराएको हो । लुम्बिनीले दिएको १९२ रनको विशाल लक्ष्य विराटनगरले १९.५ ओभरमा ८ विकेट गुमाएर भेट्टायो ।
विराटनगरलाई जित दिलाउन क्रिस सोलले महत्वपूर्ण भूमिका खेले । उनी ४ बलमा १४ रन बनाउँदै अविजित रहे । उनले २ चौका र १ छक्का प्रहार गरे ।
यस्तै, ओपनर लोकेश बमले ४७ बलमा ७१ रनको अर्धशतकीय पारी खेले । उनले ६ छक्का र ३ चौका प्रहार गरे । यस्तै, बसिर अहमदले ४० तथा मार्टिन गप्टीलले २८ रनको योगदान दिए । बलिङतर्फ लुम्बिनीका दुर्गेश गुप्ताले ३, रेमन सिमोन्ड्स र साद बिन जफरले २–२ तथा विवेक यादवले १ विकेट लिए ।
त्यसअघि टस हारेर पहिला ब्याटिङको निम्तो पाएको लुम्बिनीले निर्धारित २० ओभरमा सात विकेट गुमाएर एक सय ९१ रन बनायो ।
लुम्बिनीका लागि कप्तान रोहितकुमार पौडेलले सर्वाधिक ४६ रन बनाए । उनले २९ बलमा दुई छक्का र चार चौका प्रहार गर्दै ४६ रन बनाएका हुन् । यस्तै, टम मूर्सले ३०, विवेक यादवले १९, अर्जुन साउदले १७ रनको योगदान लिए ।
लुम्बिनीका लागि आशुतोष घिरैया र साद बिन जफरले समान १५/१५ रन, सन्दीप जोराले १२, बेन कटिङले छ र रामोन सिमन्ड्सले दुई रन बनाए । लुम्बिनीले अतिरिक्त २९ रन पाएको छ ।
विराटनगरका लागि सन्दीप लामिछाने, इस्मत आलम र राजेश पुलामीले समान एक–एक विकेट लिए । प्रतियोगितामा पहिलो खेल खेलेको लुम्बिनीले हारबाट एनपिएलको सुरुवात गरेको छ भने यसअघिका दुई खेलमा हार ब्यहोरेको विराटनगरले खाता खोलेको छ ।
