काठमाडौं । यूएईमा जारी यू–१९ एसिया कपमा आफ्नो अन्तिम खेलमा नेपालले अफगानिस्तानलाई हराएको छ । अफगानिस्तानले दिएको १२४ रनको लक्ष्य नेपालले ४३.३ ओभरमा ९ विकेट गुमाएर भेट्टायो ।
नेपालका लागि नरेन साउदले सर्वाधिक २६ रन बनाए । यस्तै, कप्तान हेमन्त धामी २२ रनमा अविजित रहे भने अर्जुन कुमालले २१, अभिषेक तिवारीले १३, आकाश त्रिपाठी र रोशन विश्वकर्माले ९–९ रन जोडे ।
नरेन र हेमन्तको संयमित ब्याटिङले नै नेपाल विजयी बन्यो । ८४ रनमा आठौं विकेट गुमाएको नेपालको इनिङलाई हेमन्त र नरेनले धानेका थिए । उनीहरुले नवौं विकेटका लागि ३१ रनको साझेदारी गरे ।
बलिङमा अफगानिस्तानका अल्लाह गजन्फर र खातिर स्टानिकजाईले ३–३ लिए ।
त्यसअघि टस जितेर पहिले बलिङ रोजेको अफगानिस्तानले ३५ दशमलव चार ओभरमा सबै विकेट गुमाउँदै एक सय २३ रनको योगफल बनायो ।
अफगानिस्तानका लागि फैसल खानले सर्वाधिक ५२ रन जोडे । उनले ६७ बलमा ४ चौका र २ छक्का प्रहार गरे । त्यस्तै खातीर खानले २६ बलमा १५ जोडे । अल्लाह गजान्फरले ११ तथा नासिर खानले १० रन जोडे ।
नेपालका लागि युनिश विक्रम सिंह ठकुरी र सन्तोष यादवले समान ३ तथा हेमन्त धामी, अभिषेक तिवारीले समान २ विकेट लिए । नेपाल पहिलो खेलमा श्रीलङ्कासँग ५५ रन र दोस्रो खेलमा बंगलादेशसँग पाँच विकेटले पराजित भएको थियो ।
