काठमाडौँ । नेपाल प्रिमियर लिग (एनपिएल)को फ्रेन्चाइज टिम पोखरा एभेन्जर्सले समर्थकहरूका लागि निःशुल्क टिकट र खाजासहित बस सेवा उपलब्ध गराउने भएको छ ।
पोखराको खेल भएको दिनमा टोलीले यो सेवा प्रदान गर्ने भएको हो । दुईवटा बससहित समर्थकहरू लिएर पोखराबाट काठमाडौं आउने र फेरि पोखरा फिर्ता हुने टोलिले जनाएको छ । त्यस्तै पोखराले आफ्ना फ्यानहरूका लागि निःशुल्क टिकट, खाजा र जर्सी पनि उपलब्ध गराउने बताएको छ ।
यो सेवा लिनका लागि पोखराले आइतबार बिहान ११ बजेदेखि साँझ ५ बजेसम्मलाई बुकिङ खुल्ला गरेको छ । पोखराभित्रबाट ४० जना र गण्डकी प्रदेशअन्तर्गत पोखराबाहिरबाट जान चाहनेहरूलाई पनि २० सिटको व्यवस्था गरिने छ ।
बुकिङका आधारमा काठमाडौं जाने व्यक्तिहरूको लक्की ड्र मार्फत नाम चयन गरिने छ । एकपटकमा नाम नआएमा अर्कोपटक प्राथमिकता दिइने पोखराले जनाएको छ ।
पोखराले मङ्गलबार दिउँसो चितवन राइनोजसँग खेल्दै एनपिएलको सुरुवात गर्नेछ ।
