काठमाडौँ । जनकपुर बोल्ट्सका लाहिरु मिलन्थाले विराटनगर किङ्सविरुद्व अर्धशतकीय पारी खेलेका छन् ।
आज त्रिभुवन विश्वविद्यालय क्रिकेट मैदान कीर्तिपुरमा सम्पन्न नेपाल प्रिमियर लिग (एनपिएल)को उद्घाटन खेलमा मिलन्थाले ५३ बल खेल्दै नौ चौका र तीन छक्काको मद्दतमा ७५ रन बनाए । मिलन्था प्रेरित जनकपुर बोल्ट्सले विराटनगर किङ्सलाई आठ विकेटले पराजित गर्यो ।
अमेरिकामा बसेर क्रिकेट खेल्ने श्रीलङ्काका मिलन्थाले ३९ बलमा दुई छक्का र चार चौका प्रहार गर्दै अर्धशतक पूरा गरेका थिए । पहिलो संस्करणको एनपिएलमा अर्धशतक बनाउने उनी दोस्रो खेलाडी बनेका छन् ।
यसअघि न्यूजिल्याण्डका पूर्वओपनर ब्याटर मार्टिन गप्टिलले जनकपुर बोल्ट्सविरुद्ध विराटनगर किङ्ग्सको तर्फबाट अर्धशतक बनाएका थिए ।
उनले ३६ बलमा सात चौका र एक छक्कासहित ५० रन बनाउन सफल भएका हुन् । गप्टिलले विराटनगरको लागि अर्धशतक प्रहार गर्दै सर्वाधिक ५५ रन बनाएर आउट भएका थिए ।
