काठमाडौँ । अछाममा नेपाल प्रहरीका प्रहरी सहायक निरीक्षक (असई)ले आफैंमाथि गोली प्रहार गरेका छन् ।
तुर्माखाद गाउँपालिका–३ को भैरवस्थान प्रहरी चौकीका इन्चार्ज समेत रहेका प्रहरी सहायक निरीक्षक (असई) किसनबहादुर चन्दले बिहीबार राति आफैंमाथि गोली प्रहार गरेका हुन् ।
चन्दले बिहीबार राति साढे ९ बजेतिर प्रहरी चौकीमै आफैंले बोकेको पेस्तोलले बायाँ छातीको माथिल्लो भागमा प्रहार गरेको बताइएको छ ।
चन्दको बाँकेको कोहलपुर मेडिकल कलेजमा उपचार भइरहेको छ । उपचाररत चन्द बोल्न सक्ने अवस्थामा रहेका छन् ।
घटनाबारे छानबिन गर्न इलाका प्रहरी कार्यालय कमलबजारका प्रमुख प्रहरी निरीक्षक हर्षबहादुर चन्दको नेतृत्वमा पाँच सदस्यीय समिति गठन गरिएको छ । छानबिन समितिले अध्ययन गरेपछि धेरै कुरा खुल्ने प्रहरीको भनाई छ ।
