एजेन्सी । इन्डियन प्रिमियर लिग (आईपीएल) को आगामी संस्करणमा बंगलादेशका कुनै पनि खेलाडी अटाउन सकेनन् । सन् २०२० पछि पहिलोपटक बंगलादेशका खेलाडीले आईपीएल खेल्न नपाउने भएका हुन् ।
२०२५ को आईपीएल लिलामीका लागि १ हजार ५७४ खेलाडीले रजिष्ट्रेशन गराएका थिए । तीमध्ये ५७४ खेलाडीलाई १० टोलीले सर्टलिस्ट गरेका थिए र ५७४ खेलाडीमा २०८ जना विदेशी थिए ।
सन् २०२५ को आईपीएलको लिलामीका लागि बंगलादेशका १३ खेलाडीले आफ्नो नाम दर्ता गरेका थिए । तीमध्ये दुईजना रिसद हुसैन र मुस्ताफिजुर रहमान मात्र सर्टलिस्टमा परेका थिए तर उनीहरुलाई पनि कसैले आफ्नो रोजाइमा पारेनन् ।
आईपीएल २०२४ को संस्करणमा मुस्ताफिजुर रहमान मात्र बंगलादेशी खेलाडी थिए जसले चेन्नई सुपर किंग्सका लागि ९ खेल खेलेका थिए । आईपीएलका सात सिजन खेलिसकेका उनले छुट्टाछुट्टै पाँचवटा टोलीबाट खेलेका छन् । पछिल्लो आईपीएलमा उनी चेन्नई सुपर किंग्समा थिए र नौ खेलमा १४ विकेट लिएका थिए । उनको आधार मूल्य दुई करोड रुपैयाँ थियो तर कसैले बोली लगाएनन् ।
लिलामीको दोस्रो दिन मुस्ताफिजुर रहमानको नाम आउँदा कुनैपनि फ्रेन्चाइजीहरुले उसलाई किनेनन् । यस्तै, लामो समयसम्म आईपीएलको हिस्सा रहेका बंगलादेशका शाकिब अल हसन यो वर्ष सर्टलिस्टमा समेत परेनन् ।
बंगलादेशका कुनै पनि खेलाडीले आईपीएलमा स्थान बनाउन नसक्दा अफगानिस्तानका खेलाडीहरू लिलामीमा निकै लोकप्रिय बने । आईपीएलको १८ औँ सिजन बंगलादेशी खेलाडीबिना हुनेछ भने अफगानिस्तानका ७ खेलाडीले कन्ट्रयाक्ट प्राप्त गरेका छन् ।
