एजेन्सी । आईपीएलका संस्थापक ललित मोदीले प्रतियोगितामा अम्पायर फिक्सिङ हुने गरेको बताएका छन् ।
युट्युबर राज शमानीसँगको पोडकास्टमा मोदीले यो खुलासा गरेका हुन् । चेन्नई सुपर किंग्सका मालिक एन श्रीनिवासनले आईपीएल खेलहरूमा चेन्नईकै अम्पायर उतार्ने आरोप मोदीले लगाएका छन् । इङ्ल्यान्डका एन्ड्रयु फ्लिन्टफलाई किन्नको लागि लिलामी पनि तय गरिएको उनी बताउँछन् ।
अन्डरवर्ल्ड डन दाउद इब्राहिमबाट ज्यान मार्ने धम्की आएपछि मोदीले सन् २०१० मा भारत छाडेका थिए । तर, यस क्रममा बीसीसीआईले उनलाई २५३ करोड रुपैयाँको ठगीको आरोप पनि लगाएको थियो । जुलाई २०२२ मा मोदी र बलिउड अभिनेत्री सुस्मिता सेन डेट गरिरहेको कुरा पनि बाहिर आएको थियो ।
राज शमानीले युट्युबमा ललित मोदीसँगको भिडियो पोडकास्ट सार्वजनिक गरेका छन् । यसमा मोदीले २००९ आईपीएल भन्दा पहिले इंग्ल्याण्डका अलराउन्डर एन्ड्रयू फ्लिन्टफले आफ्नो नाम लिलामीमा दर्ता गरेको बताएका छन् । त्यसपछि चेन्नईका मालिक एवं बीसीसीआई सचिव एन श्रीनिवासनले फ्लिन्टफ आफ्नो टोलीमा मात्र जानुपर्ने अडान लिएको खुलासा गरेका छन् ।
त्यसपछि मोदीले अन्य टोलीहरूलाई लिलामीमा फ्लिन्टफको लागि बोली नगर्न आग्रह गरे । लिलामीमा पनि त्यस्तै भयो र फ्लिन्टफलाई चेन्नईले १.५५ मिलियन डलरमा किनेको थियो । त्यसबेला, लिलामीमा बोलपत्र डलरमा गरिएको थियो ।
ललित मोदीले थप भने, ‘श्रीनिवासनले आईपीएलमा अम्पायर पनि फिक्स गरेका थिए । उनले चेन्नई सुपर किंग्सको खेलका लागि चेन्नई अम्पायर नियुक्त गरेका थिए । श्रीनिवासनले आईपीएल सफल नहुने विश्वास व्यक्त गरेका थिए । प्रतियोगिता सफल भएपछि उनी आफैंले अम्पायर फिक्सिङ गर्न थाले ।’
ललित मोदी २०१० सम्म बीसीसीआईको उपाध्यक्ष थिए । त्यस वर्ष मुम्बई र चेन्नईबीचको फाइनल खेलपछि उनलाई बीसीसीआईबाट निष्कासन गरिएको थियो । बीसीसीआईले उनलाई २५३ करोड रुपैयाँ ठगी गरेको आरोप लगाएको थियो । श्रीनिवासन तत्कालीन बीसीसीआई सचिव थिए ।
