काठमाडौ । स्वास्थ्य तथा जनसंख्यामन्त्री प्रदीप पौडेलले निर्मला पन्तको हत्याका अपराधीलाई अझै पत्ता लगाउन नसकेकोप्रति दुःख व्यक्त गर्नुभएको छ ।
बिहीवार काठमाडौंमा एकद्वार संकट व्यवस्थापन केन्द्र (ओसिएमसि) को प्रथम राष्ट्रिय सम्मेलनलाई सम्बोधन गर्दै उहाँले सरकारले निर्मला पन्तको बलात्कारपछि हत्याका अपराधीलाई अझै पक्राउ गर्न नसकेको भन्दै गुनासो गर्नुभएको हो ।
उहाँले जलनपीडितहरुको समस्या पनि विकराल रहेको बताउनु भयो । उहाँले प्रविधिको विकाससँगै घरेलु र महिला हिंसाका घटना अहिले सतहमा देखिरहेको बताउनु भयो । उहाँले नेपाल महिला अधिकारको सम्बन्धमा समावेशी रहेको भएपनि महशुस हुने किसिमले व्यवस्थापन गर्न नसकेको बताउनु भयो । उहाँले इमर्जेन्सी सेवा सबैलाई निःशुल्क हुनुपर्ने भएपनि टिकट काटेर आएमात्रै बिरामी भर्ना गर्ने नत्र फर्काइदिने संस्कृति राम्रो नभएको बताउनु भयो । उहाँले पैसा भएको मात्रैको उपचार गर्ने हो की उपचार गर्न आवश्यक भएकाको उपचार गर्ने रु भन्दै प्रश्न गर्नुभयो ।
उहाँले भन्नुभयो, ‘ उपचारात्मक पक्षबाट भन्दा हामीले यसमा सैद्धान्तिक पाटोमा केही काम गरेका छौँ । तर हामीले गरेको निर्णयलाई व्यवहारिक ढंगबाट पूर्णरुपमा कार्यान्वयन गर्न सकेका छैनौँ । त्यो मात्रै विषयले अब पुग्दैन । अरु विषय त्यहाँ जोडिएका छन् । सबैकुरा भइसकेको छ तर भएको महशुस हुन किन सकेको छैन । कहाँनेर समस्या छ । भएको महशुस हुन यस कारणले सकेन कि, निर्मला पन्तको हत्यारा, बलात्कारी को हो, आजसम्म पत्तै लागेन । मलाई धन्यवाद दिन जलन पीडितहरु आउनुभएको थियो । बुहारीले छोरी जन्माइ भनेर उनको अनुहारमा एसिड छरिएछ । अहिले घरसँँग सम्बन्ध छैन, उहाँले कसरी उपचार गर्नुभयो, अहिले सामान्य सिलाइबुनाइको कार्यक्रम गरेर जीवन गुजारिरहनुभएको छ ।’
‘दाइजो नपाएर त्यस्ता घटना थुप्रै भएका छन् । बलात्कारको घटना त एकदमै धेरै भइरहेको जस्तो देखिन्छ । महिला अधिकारको सम्बन्धमा नेपाल यस्तो देश हो, जुन देशमा पाल्र्यामेण्ट समावेशी छ । सबै पक्षमा समावेशी व्यवस्था सुनिश्चित गर्ने बाध्यकारी व्यवस्था बनाइएको छ । तर यसको बाबजुत पनि महशुस किन गर्न सकेका छैनौँ । इमर्जेन्सी सेवा त सबैलाई निःशुल्क हुनुपर्ने हो तर इमर्जेन्सीमा छिर्दा त… म स्वास्थ्यमन्त्री हुँ यो भन्न हुने हो की होइन थाहा छैन । इमर्जेन्सीमा छिर्दा टिकट काटेर आउ । टिकट काट्ने पैसा छैन भने जाउ । पैसा भएको मात्रैको उपचार गर्ने हो की उपचार गर्न आवश्यक भएकाको उपचार गर्ने हो । अनि त्यसपछि पैसा छ वा छैन भनेर सोध्ने हो रु यत्रा मन्त्रालय छन्, हामी यति धेरै छौँ । हामीले गर्न नसकेको की नचाहेको हो रु हामीलाई प्रश्न उठ्नसक्छ ।’
मन्त्री पौडेलले सबैले व्यवस्थित ढंगबाट काम गर्नुपर्ने बताउनु भयो ।
