एजेन्सी । रुबेन अमोरिम शुक्रबार म्यानचेस्टर युनाइटेडको नयाँ प्रशिक्षक नियुक्त हुनुभएको छ । उहाँले पदमुक्त गरिएका एरिक टेन हागको स्थान लिनुभएको छ ।
उन्चालिस वर्षीय पोर्चुगल प्रशिक्षकले स्पोर्टिङ्ग लिस्बनसँग दुई प्रिमेइरा लिगका शीर्षक जित्नुभएको थियो । उहाँले सन् २०२७ सम्मको सम्झौता गर्नुभएको छ र नोभेम्बर ११ मा क्लबमा सामेल हुनुहुनेछ ।
“म्यानचेस्टर युनाइटेड काम गर्ने भिसा आवश्यकताहरू पूरा गरेपछि रुबेन अमोरिमलाई पुरुष पहिलो टोलीको मुख्य प्रशिक्षकको रूपमा नियुक्त गर्न उत्सुक छ”, क्लबले आफ्नो वेबसाइटमा भनेको छ, “उहाँ जुन २०२७ सम्म रहनुहुनेछ र उहाँले आफ्नो वर्तमान क्लबप्रति आफ्नो दायित्व पूरा गरेपछि क्लबसँग एक अतिरिक्त वर्षको विकल्प रहनेछ ।”
युनाइटेडले अमोरिमलाई ‘युरोपीय फुटबलमा सबैभन्दा रोमाञ्चक र उच्च मूल्याङ्कन भएका युवा प्रशिक्षकमध्ये एक’ का रूपमा वर्णन गरेको छ ।
अमोरिम अल्ड ट्राफोर्डमा नआउञ्जेल रुड भ्यान निस्टेलरोयले टोलीको नेतृत्व गर्न जारी राख्नुहुनेछ ।
प्रिमियर लिगमा १४औँ स्थानमा रहेको युनाइटेड वेस्टहामसँग २–१ ले पराजित भएपछि क्लबले सोमबार टेन हागलाई बर्खास्त गरेको थियो । हागले नौ खेलमा मात्र तीन जीत हासिल गर्नुभएको थियो ।
