काठमाडौँ । काठमाडौँ महानगरपालिकाले साफ महिला च्याम्पियनसिप २०२४ को फाइनल खेल प्रत्यक्ष प्रशारण एलइडी स्क्रिनबाट देखाउने भएको छ ।
महानगरले नेपाली महिला टोलिलाई हौसला प्रदान गर्दै टुँडिखेल, चावहिल फुटबल ग्राउण्ड र सानो गौचरन (हाँडीगाउँ)मा प्रत्यक्ष प्रशारणको व्यवस्था मिलाएको हो ।
खेलमैदानमै पुगेर खेल हेर्ने अवसर सबैलाई प्राप्त हुन कठिन रहेको भन्दै महानगरले खेलमैदानमा पुग्न नसक्ने तर खेल मैदान जत्तिकै उत्साहका साथ खेल अवलोकन गर्ने अवसरका लागि सो स्थानमा खेल हेर्ने प्रवन्ध मिलाएको जनाएको छ ।
साथै, महानगरले खेलको प्रवर्धन, खेलाडी, प्रशिक्षक र व्यवस्थापकको प्रोत्साहनका प्रदर्शन हुने प्रत्यक्ष प्रसारण खेल अवलोकनका लागि आफूलाई पायक पर्ने स्थानमा जान फुटबल खेलप्रेमी दर्शकहरुलाई अनुरोध समेत गरेको छ ।
साफ महिला च्याम्पियनसिपको उपाधिका लागि आज साँझ साढे ६ बजे नेपालले बंगलादेशसँग प्रतिस्पर्धा गर्दैछ ।
