काठमाडौं । साफ महिला च्याम्पियनसिप २०२४ को फाइनल आज बुधबार हुँदैछ ।
उपाधिका लागि आज नेपाल र बंगलादेशले प्रतिस्पर्धा गर्दैछन् । दशरथ रंगशालामा आज साँझ साढे ६ बजे हुने फाइनल खेल हेर्न प्रधानमन्त्री केपी शर्मा ओली समेत जानुहुने कार्यक्रम रहेको छ ।
उपाधि विजेतालाई प्रधानमन्त्री ओलीले पुरस्कारसमेत वितरण गर्ने उहाँको सचिवालयले जनाएको छ ।
आयोजक नेपालले भारतलाई पेनाल्टीमा ४–२ले हराउँदै र बंगलादेशले भुटानलाई ७–१ ले हराउँदै फाइनलमा स्थान बनाएका हुन् ।
नेपाल आज बलियो प्रतिद्वन्द्वी बङ्गलादेशलाई पराजित गर्दै पहिलो पटक साफ च्याम्पियनसिपको उपाधि जित्ने लक्ष्यका साथ मैदानमा उत्रँदैछ ।
सन् २०१० मा बङ्गलादेशबाट सुरु भएको साफ च्याम्पियनसिपमा नेपाल पाँच पटक फाइनलमा पुगे पनि उपाधि जित्न भने सकेको छैन ।
यसअघिका ६ मध्ये पाँच संस्करणमा नेपाल उपविजेतामा सीमित भएको छ । जसमा भारतसँग चार पटक र बंगलादेशसँग एकपटक पराजित भइ उपविजेतामा चित्त बुझाएको थियो ।
