काठमाडौं । स्कटल्यान्डका ब्रान्डन म्याकमुलेनले सुदूरपश्चिम रोयल्सबाट नेपाल सुपर लिग (एनपीएल) खेल्ने भएका छन् । रोयल्सले एनपीएलका लागि पहिलो विदेशी खेलाडीका रुपमा म्याकमुलेनलाई टोलीमा भित्र्याएको हो ।
उनले स्कटल्यान्डबाट १६ टि ट्वान्टी आईमा ६ अर्धशतकसहित ४ सय ९७ रन बनाएका छन् । म्याकमुलेनले सन् २०२३ मा जर्मनीविरुद्ध खेल्दै टि ट्वान्टी आईमा डेब्यु गरेका थिए ।
यस्तै, २२ ओडिआई खेलमा उनले २ शतक र २ अर्धशतकसहित ७ सय २१ रन बनाएका छन् । सुदूरपश्चिम रोयल्सले यसअघि अस्ट्रेलियाका विश्वकप विजेता पूर्व क्रिकेटर ब्राड हजलाई आफ्नो प्रमुख मेन्टर नियुक्त गरिसकेको छ ।
दीपेन्द्रसिंह ऐरी मार्की खेलाडी रहेको सुदूरपश्चिम रोयल्सको मुख्य प्रशिक्षक जगत टमाटा रहेका छन् । सुदूरपश्चिम रोयल्समा ओलम्पियन दीपक विष्ट ब्रान्ड एम्बेसडर र केपी खनाल सोसियल एक्टिभिस्ट एम्बेसडर रहेका छन् ।
नेपाल क्रिकेट संघ (क्यान)को आयोजनामा हुन गइरहेको ८ टोलीको सहभागिता रहेको एनपिएल मंसिर १६ गते देखि सुरू हुनेछ ।
सुदूर पश्चिम रोयल्समा दीपेन्द्र सिंह ऐरी, आरिफ शेख, अभिनास बोहोरा, विनोद भण्डारी , अर्जुन कुमाल, खडक बोहोरा, इशान पाण्डे, नरेश बुढाऐर, भोजराज भट्ट, नरेन साउद , अमित श्रेष्ठ, ब्रान्डन मक्मलेन आबद्ध भइसकेका छन् । टोलीसँग अब तीनजना विदेशी खेलाडीको कोटा बाँकी रहेको छ ।
