काठमाडौं । कात्तिक महिनाका लागि अधिकांश वाणिज्य बैंकहरूले निक्षेपको ब्याजदर घटाएका छन् । बैंकहरूले अघिल्लो महिनाको तुलनामा कात्तिकमा औसतमा ०.२५ प्रतिशतले व्यक्तिगत मुद्दती निक्षेपको ब्याजदर घटाएका हुन् ।
कात्तिकमा २० वाणिज्य बैंकमध्ये १० बैंकले ब्याजदर घटाएका छन् । ९ बैंकले स्थिर राखेका छन् भने सानिमा बैंकले व्यक्तिगत मुद्दती निक्षेपको ब्याजदर बढाएको छ । सानिमाले कात्तिकका लागि ०.२५ प्रतिशतले ब्याजदर बढाएको छ । यससँगै यसको मुद्दती निक्षेपको ब्याजदर ५.९ प्रतिशतबाट ६.१५ पुगेको छ ।
सबैभन्दा बढी हिमालयन बैंकले ब्याजदर घटाएको छ । कात्तिकमा हिमालयनले ०.७५ प्रतिशतले ब्याजदर घटाउदै ६.२५ प्रतिशत दिने भएको छ । असोजमा ७ प्रतिशत थियो ।
कार्तिकमा एनएमबी, एसबीआई, प्रभु, माछापुच्छ्रे, नेपाल इन्भेस्टमेन्ट मेगा, ग्लोबल आईएमई, कुमारी, एभरेस्ट र नेपाल बैँकले ब्याजदर स्थिर राखेका छन् ।
असोजमा अधिकतम व्यक्तिगत मुद्दतीको औसत ब्याजदर ६.३९ प्रतिशत रहेकोमा कात्तिकमा ६.१८ प्रतिशतमा झरेको छ ।
