एजेन्सी । अनुभवी ब्याटिङ अलराउन्डर सनथ जयसूर्या श्रीलंकाली क्रिकेट टोलीको मुख्य प्रशिक्षकमा नियुक्त भएका छन् । सोमबार श्रीलंका क्रिकेटको कार्यकारी समितिले जयसूर्यालाई मुख्य प्रशिक्षक बनाउने निर्णय गरेको हो ।
एसएलसीले एक्स पोस्टमार्फत यो जानकारी दिएको छ ।
५५ वर्षीय जयसूर्यालाई भारत, इङ्ल्यान्ड र न्युजिल्यान्डविरुद्धको टोलीको प्रदर्शनका लागि इनाम मिलेको हो । टोलीले सेप्टेम्बरमा न्युजिल्यान्डविरुद्धको टेस्ट सिरिजमा घरेलु मैदानमा क्लिन स्वीप गरेको थियो ।
टोलीले तेस्रो टेस्टमा इंग्ल्याण्डलाई ८ विकेटले पराजित गरे पनि ३ खेलको शृङ्खला २-१ ले गुमाएको थियो । यसअघि भारतविरुद्धको एकदिवसीय सिरिजमा टोलीले २–० ले जित हासिल गरेको थियो ।
जयसूर्या सेप्टेम्बर महिनामा श्रीलंकाली टोलीको अन्तरिम मुख्य प्रशिक्षक बनेका थिए । जयसूर्याको कार्यकाल मार्च ३१, २०२६ सम्म रहनेछ ।
सिल्भरउडको राजीनामापछि जयसूर्यालाई अन्तरिम प्रशिक्षक बनाइएको थियो । सन् २०२४ को टी–२० विश्वकपमा खराब प्रदर्शनपछि सिल्भरउडले राजीनामा दिएका थिए ।
वानिन्दु हसरंगाको कप्तानीमा रहेको श्रीलंकाली टोली २०२४ को टी–२० विश्वकपको पहिलो चरणबाटै बाहिरिएको थियो । टोली बंगलादेश र दक्षिण अफ्रिकासँग पराजित भएको थियो ।
