काठमाडौं । काठमाडौँ उपत्यकाका खोला किनारामा २० मिटर मापदण्ड कायम गर्ने सर्वोच्च अदालतको फैसलाविरुद्ध प्रभावित क्षेत्रका जनताहरूले विरोध प्रदर्शन गरेका छन् ।
बिहीबार माइतीघरमा प्रभावित क्षेत्रका बासिन्दाहरूले मापदण्डको नाममा जनता विस्थापित गर्न पाइँदैन भन्दै प्रदर्शन गरेका हुन् ।
सर्वोच्च अदालतले नदी संरक्षणसम्बन्धी एक मुद्दाको फैसलामा वाग्मती, विष्णुमतीलगायतका नदीहरुमा हाल २० मिटर मात्र खुला क्षेत्र रहेकामा थप २० मिटर राख्नुपर्ने आदेश दिएको थियो ।
‘गैर न्यायिक नदी थप २० मिटर मापदण्ड खारेज गर’, ‘मापदण्डका नाममा जनतालाई उठिबास गर्न पाइँदैन’, ‘गैर न्यायिक मापदण्डको नाममा राज्यद्वारा लुटिएको भूमि फिर्ता गर’, ‘जनतालाई उठिबास गर्ने गैर न्यायिक सडक तथा खोला मापदण्ड खारेज गर’, ‘आदिवासीको अधिकार सुरक्षित गर’, ‘खोलानदीको मापदण्ड खारेज गर’ भन्दै उनीहरु आन्दोलनमा उत्रिएका हुन् ।
राजेन्द्र महतो, सुमन सायमी लगायतले सडकमा नै सुतेर विरोध प्रदर्शनमा सहभागिता जनाएका थिए ।
