काठमाडौँ । माछापुच्छ्रे बैंकको २२औँ वार्षिक साधारण सभा (एजीएम) पुस २ गते हुने तय भएको छ । यसअघि कात्तिक ६ गते तय भएपनि स्थगित गरिएको थियो । शुक्रबार बसेको सञ्चालक समितिको बैठकले बिहान ११ बजे होटल पोखरा ग्राण्ड, पोखरामा साधारण सभा गर्ने निर्णय गरेको हो । सभा भिडियो कन्फ्रेन्स मार्फत गर्न लागिएको जनाएको छ । साधारण सभाले सञ्चालक समितिले प्रस्ताव गरे बमोजिम हाल कायम चुक्ता पूँजीको ३.३७ प्रतिशत नगद लाभांश (बोनस शेयर तथा नगद लाभांशमा लाग्ने करसहित) र ७.०३ प्रतिशत बोनस शेयर पारित गर्ने कम्पनी सचिव टिका भट्टराईले जनाएका छन् । साधारण सभाबाट सर्वसाधारण समूहका शेयरधनीहरुको तर्फबाट सञ्चालक समितिमा प्रतिनिधित्व गर्ने सञ्चालकहरु चयन गर्नेछ ।
साथै साधारण सभाले अन्य बैंक तथा वित्तीय संस्थासँग एक आपसमा गाभ्न/गाभिने (मर्जर गर्न वा प्राप्ति गर्न) तथा वैदेशिक साझेदारीमा जाने सम्बन्धी निर्णय गर्न तथा सो सम्बन्धी आवश्यक सम्पूर्ण कार्य अगाडि बढाउन सञ्चालक समितिलाई अख्तियारी प्रदान गर्ने प्रस्ताव समेत पारित गर्नेछ । वार्षिक साधारण सभा प्रयोजनका लागि असोज २२ गते शेयर दाखिला खारेज बन्द (बुक क्लोज) गरिएको छ ।
