विराटनगर । मोरङको सुन्दरहरैँचामा दुई नाबालिग मृत भेटिएका छन् । सुन्दरहरैँचा नगरपालिका–७मा रहेको स्थानीय नारायण न्यौपानेको केरा बगानभित्र १ वर्षीया आइका र ३ वर्षीया अर्पणा कार्की एकैठाउँमा मृत भेटिएका हुन् ।
उनीहरूकी आमा २९ वर्षीया अस्मिता न्यौपाने पनि बेपत्ता रहेकी इप्रका बेलबारीका इन्स्पेक्टर तेजबहादुर दाहालले जानकारी दिए ।
घरमा श्रीमान अर्जुन कार्कीसँग सामान्य झगडापछि अस्मिता छोरी लिएर हिँडेको बताइएको छ ।
प्रहरीको प्रारम्भिक अनुसन्धानमा घटनाको प्रकृति हेर्दा विष खुवाएर दुवै बालिकाको हत्या भएको जस्तो देखिएको इन्स्पेक्टर दाहालले बताए । घटनास्थल नजिकै कीटनाशक औषधि ‘मेटासिट’ को बट्टा पनि फेला परेको उनले बताए ।
छोरीहरूलाई विष खुवाएर आमा सम्पर्कविहीन भएको हुनसक्ने प्रहरीको अनुमान छ । प्रहरीको अनुसार अस्मिताको खोजिकार्य र घटनाबारे अनुसन्धान भईरहेको छ ।
