काठमाडौँ । समता लघुवित्त वित्तीय संस्थाको सातौँ वार्षिक साधारण सभा पुस १४ गते हुने भएको छ । साधारण सभाले सञ्चालक समितिले प्रस्ताव गरे अनुसार हाल कायम चुक्ता पूँजीको २० प्रतिशत बोनस शेयर र ६.३२ प्रतिशत नगद लाभांश (बोनस शेयरमा लाग्ने करसहित) पारित गर्ने कम्पनी सचिव विश्वराज श्रेष्ठले बताउनु भयो।
आज शुक्रबार विहान बसेको सञ्चालक समितिको बैठकले बिहान १०ः३० बजे होटल क्लासिक प्रालि सिमरा बारामा साधारण सभा गर्ने निर्णय गरेको प्रबन्धक तथा कम्पनी सचिव श्रेष्ठले जानकारी दिनु भएको छ । साधारण सभा प्रयोजनका लागि पुस ५ गतेदेखि १४ गतेसम्म शेयर दाखिला खारेज दर्ता बन्द (बुक क्लोज) गर्ने निर्णय गरिएको कम्पनी सचिव श्रेष्ठले बताउनु भयो ।
समता र घरेलु लघुवित्त एकआपसमा गाभिन लागेको हुँदा शेयर आदानप्रदान दर (स्वाप रेसियो) पनि साधारण सभाले पारित गर्नेछ । एक आपसमा गाभिएपछि लघुवित्त संस्थाको नामा समता घरेलु लघुवित्त वित्तीय संस्ता रहने र मर्जरका लागि अन्तिम सम्झौता गर्न र सो सम्बन्धी आवश्यक कार्य गर्न सञ्चालक समितिलाई अख्तियारी दिने प्रस्ताव समेत साधारण सभाले पारित गर्ने कम्पनी सचिव श्रेष्ठले जानकारी दिनुभयो।
