काठमाडौँ । भक्तपुरको गठ्ठाघरमा बिहीबार ट्रकको ठक्करबाट घटनास्थलमै मृत्यु भएका व्यक्तिको पहिचान खुलेको छ । ओखलढुंगाको चिशंखुगढी नगरपालिका–४ रातमाटे घर भएका उत्तम कोइरालाको दुर्घटनामा निधन भएको हो ।
सुरुमा प्रहरीले मृतकको गलत सनाखत गरेको थियो । ट्रकको ठक्करबाट युवतीको निधन भएको बताइएको थियो ।
कोइरालाको सनाखत भएसँगै उनका आफन्तहरु काठमाडौं आइपुगेका छन् । उत्तमका तीन छोरी छन् । जेठी छोरी अष्ट्रेलियामा रहेको र माइली छोरी हप्तादिन अघि मात्रै अमेरिका पढ्न गएको खुलेको छ । यस्तै, कान्छी छोरी भने काठमाडौंमा पढ्दैछिन् ।
घटनामा संलग्न ट्रक चालक सर्लाही मलङ्गवा नगरपालिका–२ का ३२ वर्षीय सतेन्द्र श्रेष्ठलाई बिहिबार नै प्रहरीले नियन्त्रणमा लिएको थियो ।
ना६ख २१७३ नम्बरको ट्रकले बा३९प ८९४४ नम्बरको स्कुटरमा सवार कोइरालालाई दिउँसो पौने दुई बजेको आसपासमा ठक्कर दिएको थियो । सार्वजनिक भएको सिसीटिभी फुटेजमा ट्रकले स्कुटरलाई ठक्कर दिएको स्कुटरमा सवार कोइरालालाई लतार्दै लगेको देख्न सकिन्छ ।
