काठमाडौं । भदौ महिनाका लागि वाणिज्य बैंकहरूले निक्षेपको ब्याजदर थप घटाएका छन् । बैंकहरूले अघिल्लो महिनाको तुलनामा भदौमा औसतमा ०.१९ प्रतिशतले व्यक्तिगत मुद्दती निक्षेपको ब्याजदर घटाएका हुन् ।
भदौमा २० वाणिज्य बैंकमध्ये १२ बैंकले ब्याजदर घटाएका छन् । ७ बैंकले स्थिर राखेका छन् भने एउटा बैंक प्राइम कमर्सियलले व्यक्तिगत मुद्दती निक्षेपको ब्याजदर बढाएको छ ।
साउन महिनामा व्यक्तिगत मुद्दतीमा वाणिज्य बैंकहरुको अधिकतम औसत ब्याजदर ६.७३ प्रतिशत रहेकोमा भदौमा घटेर ६.५४ प्रतिशतमा झरेको छ ।
भदौमा स्टान्डर्ड चार्टर्ड, नबिल, ग्लोबल आईएमई, लक्ष्मी सनराइज, सिटिजन्स, माछापुच्छ्रे र कुमारीले ब्याजदर स्थिर राखेका छन् । कृषि विकास, राष्ट्रिय वाणिज्य, एसबीआई, नेपाल, सानिमा, नेपाल इन्भेस्टमेन्ट मेगा, सिद्धार्थ, प्रभु, एनएमबी, एनआईसी एसिया, हिमालयन र एभरेस्ट बैंकले ब्याजदर घटाएका छन् ।
भदौमा व्यक्तिगत मुद्दती निक्षेपमा सबैभन्दा धेरै ब्याजदर एनएमबी र एनआईसी एसिया बैंकको रहेको छ । उनीहरुले ७.४१ प्रतिशत ब्याजदर कायम गरेका छन् । प्रभु र एभरेष्ट बैंकले सबैभन्दा कम ६.१ ब्याजदर कायम गरेको छ ।
