काठमाडौँ । नेपालकी म्याराथन धाविका सन्तोषी श्रेष्ठले पेरिस ओलम्पिक २०२४ मा म्याराथनको रुट केही कठिन भएकाले सोचेअनुरुप प्रदर्शन गर्न कठिन बताएको बताउनुभएको छ ।
पेरिस ओलम्पिकमा ९२ धाविकामध्ये उनी प्रतिष्पर्धामा ७९औं स्थानमा खुम्चिनुभएको छ । जहाँ ११ धाविकाले म्याराथन पूरा गर्न नै सकेनन् । म्याराथन पूरा गरेपछि पत्रकारसँगको कुराकानीमा सन्तोषीले नेपालबाट करियरकै उत्कृष्ट प्रदर्शन गर्ने लक्ष्यका साथ आएपनि पेरिस पुगेपछि रुट कठिन भएको जानकारी पाएपछि पूरा गर्न नै चुनौती भएको बताउनु भयो । उहाँले आफ्नो करियरकै चुनौतीपूर्ण कोर्सका रूपमा यो म्याराथनलाई लिएको उल्लेख गर्नुभयो । सन्तोषीले आफू १५ किलोमिटरसम्म समय सुधार गर्न भन्दा पनि दूरी पार गर्न तवरबाट दौडिएको बताउनु भयो ।
यो म्याराथनमा नेदरल्याण्डकी सिफन हसन दुई घण्टा २२ मिनेट ५५ सेकेण्डका साथ स्वर्ण जित्न सफल हुनुभयो । उहाँले ओलम्पिक रेकर्ड राख्नुभयो । इथोपियाकी टिगस्ट एसिफाले रजत र हेलेन ओबिरीले कांस्य पदक जितिन् । एसिफाले दुई घण्टा २२ मिनेट ५८ सेकेण्ड समय लगाउँदा हेलेनले दुई घण्टा २३ मिनेट १० सेकेन्डमा पार गर्नुभयो । सन्तोषीले भने दुई घण्टा ५५ मिनेट ६ सकेण्डको समय खर्चिनुभयो । पेरिस ओलम्पिकमा नेपालका सात खेलाडीले प्रतिष्पर्धा गरे । कुनैपनि खेलाडीको प्रदर्शन सुखद् रहन सकेन ।
अधिकांश खेलाडीको चुनौती प्रारम्भिक चरणमा नै सीमित हुँदा प्रदर्शन पनि राम्रो बन्न सकेन । सन्तोषीको चुनौती नै पेरिस ओलम्पिकमा नेपालको अन्तिम प्रतिष्पर्धा हो । यसअघि सुटिङकी सुस्मिता नेपाल, टेबल टेनिसका स्यान्टु श्रेष्ठ, पौडीका एलेक्जेन्डर शाह र डुवाना लामा, जुडोकी मनिता श्रेष्ठ र ब्याडमिन्टनका प्रिन्स दाहालले चुनौती प्रश्तुत गरेका थिए । सन्तोषीको करियरको यो दोस्रो अन्तर्राष्ट्रिय म्याराथन हो । बंगलादेशमा सम्पन्न बंगबन्धु शेख मुजिब ढाका म्याराथन २०२४ मा उनले स्वर्ण जितेकी थिइन् । निर्धारित दूरी दुई घण्टा ४६ मिनेट २२ सेकेण्डमा पार गरेकी थिइन् ।
यो नै उनले दौडिएको पहिलो र एक मात्रै म्याराथन हो । त्यो समय उनले पेरिसमा सुधार गर्न सकिनन् । गत १९ औं एशियाली खेलकुदमा पनि उनले सहभागिता जनाएकी थिइन् । सन्तोषीको मुख्य प्रतिष्पर्धा १० हजार मिटर दौड हो । यसै विधामा उनले १३औं दक्षिण एसियाली खेलकुद (साग) मा स्वर्ण पदक पनि जितेकी छन् । नेपाललाई एथलेटिक्सतर्फ सागमा स्वर्ण दिलाउने उनी पहिलो महिला खेलाडी हुन् ।
३० वर्षीय सन्तोषीले युनिभर्सालिटी कोटाअन्तर्गत पेरिस ओलम्पिकको म्याराथनमा आफ्नो स्थान सुरक्षित गरेकी हुन् । नेपाल ओलम्पिक कमिटी र नेपाल एथलेटिक्स संघले सन्तोषीको सहभागिताका लागि नाम सिफारिस गरेको थियो ।
