काठमाडौँ । मनसुन पुन: सक्रिय भएसँगै काठमाडौँ उपत्यकामा रातिदेखि नै वर्षा भईरहेको छ । भारी वर्षाका कारण यहाँँको ट्राफिक व्यवस्थापन अस्तव्यस्तत भएको छ ।
सडकमा पानी जमेका कारण माइतीघर, बबरमहल, भद्रकाली, थापाथली, बालाजु र त्रिपुरेश्वर क्षेत्रमा अत्यधिक ट्राफिक जाम भएको छ ।
लैनचोरबाट केशरमहलतर्फको सडक र माइतीघरबाट भद्रकाली तर्फ जाने सडकमा पानी बगिरहेको छ । त्रिपुरेश्वर सडकमा पनि पानी जमेपछि कालीमाटीबाट त्यसतर्फ आउने सवारीमा चाप परेको छ ।
पानी जमेको ठाउँमा सवारीको फ्लो राम्रो हुन नसकेको कारण ट्राफिक व्यवस्थापनमा समस्या भएको उपत्यका ट्राफिक प्रहरी कार्यालयका एसएसपी जीवन श्रेष्ठले बताए ।
यस्तै, भारी वर्षाले काठमाडौं उपत्यकाका विभिन्न क्षेत्र डुबानमा परेको छ । नदी तथा खोलामा पानीको वहाबसँगै जोखिम बढेको छ । खोला किनारका सडक जलमग्न हुँदा पनि मूल सडकमा सवारी चाप बढेको हो।
