काठमाडौं । नेपाली राष्ट्रिय क्रिकेट टोलीले भारतमा प्रशिक्षण गर्ने भएको छ । नेपाली टोलीले क्यानडा भ्रमणअघि भारतमा प्रशिक्षण गर्ने भएको हो । क्यानले क्यानडा भ्रमणका लागि आइतबार रोहितकुमार पौडेलको कप्तानीमा २२ सदस्य टोली बन्द प्रशिक्षणमा बोलाएको छ ।
टोलीले एक हप्ता त्रिवि क्रिकेट मैदानमा फिटनेश ट्रेनिङ गर्नेछ, त्यसपछि भारत जाने तयारी छ ।
प्रशिक्षणमा बोलाइएका कप्तान रोहित पौडेल, दीपेन्द्रसिंह ऐरी र स्पिनर सन्दीप लामिछानेले अहिले क्यानडामा जारी ग्लोबल टी–२० खेलिरहेका छन् । ग्लोबल टी–२० पछि दीपेन्द्र र रोहित टी–१० लिग खेल्ने वेष्ट इण्डिज जानेछन् । तीनै जना सिधै क्यानडामा टोलीसँग जोडिनेछन् ।
नेपालले आगामी सेप्टेम्बरमा क्यानडामा आईसीसी विश्वकप लिग–२ र त्रिकोणात्मक टी–२० आई सिरिज खेल्नेछ । घरेलु टोली क्यानडा, नेपाल र ओमानबीच उक्त प्रतिस्पर्धा हुनेछ । लिग–२ त्रिकोणात्मक सिरिज २०२७ सम्म चल्नेछ ।
प्रतियोगितामा नेपाल, अमेरिका, क्यानडा, स्कटल्यान्ड, नेदरल्यान्ड्स, यूएई, ओमान र नामिबियाबीच प्रतिस्पर्धा हुनेछ । शीर्ष चारमा रहने टोलीले सोझै २०२७ को एकदिवसीय विश्वकप छनोट खेल्न पाउनेछन् भने पुछारमा रहने चार टोलीले प्लेअफ खेल्नुपर्ने हुन्छ ।
