काठमाडौं । नेपाल एयरलाइन्सको इतिहासमै महिला पाइलटले अन्तर्राष्ट्रिय उडान गरेको कीर्तिमान भावना पन्तको नाममा बनेको छ ।
भावनाले अहिलेसम्म दुबई, कतार, मलेसिया, हङकङ, थाइल्याण्ड, दिल्ली, मुम्बई र बैंगलोरको सफल उडान गरिसकेकी छन् । उनले आँट र हिम्मत बोकेर अन्तर्राष्ट्रिय उडान भर्दै आएकी छन् ।
कामको सिलसिलामा सौर्य एयरलाइन्समा रहँदा पहिलो महिला जेट विमान चालकको इतिहास पनि उनले कार्न सफल भएकी छन् । ६ वर्ष नेकोन एयर, ९ वर्ष बुद्ध एयर, दुई वर्ष सौर्य एयरलाइन्समा काम गरेकी भावना अहिले नेपाल एयरलाइन्समा छिन् । उनले अहिलेसम्म २६ वर्ष आकाशमा उडान भरिसकेकी छन् ।
भावनालाई सबैभन्दा सुरक्षित यात्रा पनि बिमानकै लाग्छ । नेपालमा बेला–बेलामा हुने विमान दुर्घटनाका खबरबारे उनि भन्छिन्, ‘सामान्य मानिसहरु जस्तै पाइलटलाई पनि आफ्नो जीवन अति नै प्यारो हुन्छ । हामी सबैले बुझ्नु पर्ने कुरा के हो भने कोही पनि पाइलटले विमान दुर्घटना होस् भन्ने सपनामा पनि चिताउँदैन । विमान दुर्घटनामा परेपछि कुनै एउटै पक्षलाई मात्र दोष दिनु हुँदैन भन्ने लाग्छ ।’
‘विविध बाधा अड्चन र चुनौती पन्छाउँदै ककपिटसँग अटुट सम्बन्ध गाँसेकी छन् भावनाले । उनले धर्ती छोडेर निलो आकाशमा त्यो पनि सयौं यात्रुलाई गन्तव्यमा पुर्याउने जिम्मेवारी सम्हाल्दै आएकी छन् ।
१७ बर्षको उमेरमा सन् १९९१ मा रुसमा पाइलटको अध्ययन पुरा गरेर नेपाल फर्किएपछि हवाई सेवामा प्रवेश गरेकी ४५ वर्षीय पन्त विगत २६ वर्षदेखि नेपालको हवाई क्षेत्रमा आवद्ध छिन् । उनी नेपालकै तेस्रो महिला पाइटलसमेत हुन् । क्याप्टेन पन्त तत्कालीन राज परिवारका निजी क्याप्टेन बलराम पन्तकी माहिली छोरी हुन् ।
पन्त एक छोरा तथा एक छोरीकी आमासमेत हुन् ।
