काठमाडौं । मंगलबार शेयर बजारमा नेप्से परिसूचक ५ दशमलव ७५ अंकले घटेर २ हजार ६१ दशमलव ४१ विन्दुमा झरेको छ । मंगलबार नेप्से परिसूचकसँगै सेन्सेटिभ इन्डेक्स पनि शून्य दशमलव ७४ अंक घटेर ३८७ दशमलव ४२ विन्दुमा झरेको छ । अघिल्लो कारोबार दिनको तुलनामा कारोबार रकम भने कम भएको छ ।
सोमबार रू. ७ अर्ब २० करोडभन्दा बढीको शेयर कारोबार भएकोमा मंगलबार रू. ६ अर्ब ६ करोड ९३ लाख ३१ हजार बराबरको ९७ लाख ५५ हजार ५४७ कित्ता शेयर खरिद विक्री भएको हो । २०५ ओटा कम्पनीको ४७ हजार ७६९ पटकको व्यापारमा उक्त रकम बराबरको शेयर कारोबार भएको हो ।
मंगलबार ५८ ओटा कम्पनीको शेयरमूल्य बढेको छ भने ११६ कम्पनीको घटेको छ । बाँकी ३१ ओटा कम्पनीको शेयरमूल्य स्थिर रहेको छ । लघुवित्त कम्पनीको शेयरमा बढी आकर्षण देखिएको बजारमा ६ कम्पनीको शेयरमूल्य ९ प्रतिशतभन्दा बढीले वृद्धि भएको छ ।
यो दिन ९ प्रतिशतभन्दा बढी मूल्य बढ्ने कम्पनीहरुमध्य पाँच लघुवित्त कम्पनी रहेका छन् । यस दिन महुली सामूदायिक लघुवित्त, उन्नती सहकार्य लघुवित्त र गुराँस लघुवित्तको ९ दशमलव ९८ प्रतिशत, ग्लोबल आइएमई लघुवित्तको शेयरमूल्य ९ दशमलव ९४ प्रतिशत, नारायणी डेभलपमेण्ट बैंकको ९ दशमलव ८३ प्रतिशत र नेशनल माइक्रोफाइनान्स वित्तीय संस्थाको शेयरमूल्य ९ दशमलव ५१ प्रतिशतले बढेको हो ।
मंगलबारको कारोबारमा मल्टिपर्पस फिनान्स र सिन्धु विकास बैंकको शेयरमूल्य सर्वाधिक ४ प्रतिशतभन्दा बढीले घटेको छ । मल्टिपर्पस फिनान्सको ४ दशमलव ७६ प्रतिशतले मूल्य घटेर रू. १६० र सिन्धु विकास बैंकको ४ दशमलव २२ प्रतिशतले घटेर रू. १५९ मा झरेको हो । यो दिन कारोबारमा आएका १२ ओटा समूहमध्ये लघुुवित्तको १ दशमलव ८६ प्रतिशत, जीवन बीमाको शून्य दशमलव ३८ प्रतिशत र वाणिज्य बैंकको शून्य दशमलव शून्य १ प्रतिशत बढेको छ । बाँकी समूहमध्ये व्यापारिक समूहको परिसूचक सर्वाधिक २ दशमलव ५९ प्रतिशत घटेको छ ।
त्यस्तै होटलको १ दशमलव शून्य २ प्रतिशत, विकास बैंकको १ दशमलव शून्य ९ प्रतिशत, जलविद्युतको १ दशमलव शून्य ८ प्रतिशत, वित्तको शून्य दशमलव ६९ प्रतिशत, निर्जीवन बीमाको शून्य दशमलव ८२ प्रतिशत, उत्पादन तथा प्रशोधनको २ दशमलव ३४ प्रतिशत, अन्यको १ दशमलव शून्य ९ प्रतिशत र म्युचुअल फण्डको शून्य दशमलव ६२ प्रतिशत परिसूचक घटेको छ ।
मंगलबार पनि नेपाल लाइफ इन्स्योरेन्स कम्पनीकै सर्वाधिक रकमको शेयर कारोबार भएको छ । आइतबारदेखिनै उक्त कम्पनीको सर्वाधिक रकमको कारोबार हुँदै आएको छ । मंगलबारको कारोबारमा सर्वाधिक हिस्सा ओगटेको उक्त कम्पनीकोे रू. ५२ करोड ३८ लाख २६ हजार बराबरको शेयर कारोबार भएको हो । यो दिन कम्पनीको शेयरमूल्य भने प्रतिकित्ता रू. २७ ले घटेर अन्तिम मूल्य रू. २ हजार २६५ कायम भएको छ । मंगलबारको कारोबारमा उक्त कम्पनीकोे न्यूनतम रू. २ हजार २२५ देखि अधिकतम रू. २ हजार ३९४ सम्ममा शेयर खरीदविक्री भएको छ ।
गत विहीवार ८ दशमलव २७ अंक, आइतवार ४६ दशमलव ४३ अंक र सोमवार ५६ दशमलव ७२ अंकले बजार बढेको थियो । मंगलवार २ हजार ८५ दशमलव ५७ विन्दुदेखि खुलेको बजार २ हजार १०० विन्दु पार गरी तल झरेको हो । १ बजेर ५४ मिनेटसम्म बढेको बजार त्यसपछि भने नाफा बुक गर्नेहरुको प्रभावका कारण तल झरेको हो ।
