काठमाडौं । राष्ट्रिय स्वतन्त्र पार्टीले संवैधानिक परिषद्मा बहुमत पुर्याउने हेतुले उपसभामुखले अमेरिकी दूतावासलाई लेखेको पत्र सार्वजनिक गरिएको आशंका गरेको छ । बिहीबार बसेको रास्वपा केन्द्रीय समिति बैठकपछि बोल्दै पार्टीका प्रवक्ता मनिष झाले यस्तो बताएका हुन्।
पत्रका विषयमा पार्टीले अनौपचारिकरूपमा बुझ्दा दूतावासमा दर्ता नभएको पाइएको उनको भनाइ छ । ‘यो पत्रको मिति १८ महिना अगाडिको रहेछ । अमेरिकी दूतावासमा रजिस्टर भएको पनि छैन । सिफारिसअनुसार कसैले सुविधा लिइएको पनि पाइएन । ’, उनले भने ।
पत्रको एउटामात्रै कपी बाहिर आएको तथा त्यसमा दूतावासको छाप नरहेको झाले बताए । यस प्रकरणमा उपसभामुखको आशय र नियत गलत नभएको बताउदै उनले भने, ‘यसमा आशय पनि गलत छैन, नियत पनि गलत छैन र यसको प्रभाव पनि कतै परेको छैन ।’
संवैधानिक परिषदका लागि यो सबै चलखेल भएको हो कि भन्ने आशंका पार्टीलाई रहेको प्रवक्ता झाले बताए । उपसभामुख अहिले पार्टीको सदस्य नभएको भन्दै झाले भने, ‘उहाँ हाम्रो पार्टीको सदस्य हुनुहुन्न । यो विषयमा संसद सचिवालय र राज्य व्यवस्था समितिमा उजुरी परिसकेको छ । त्यहाँ के छलफल र निर्णय हुन्छ, त्यसको आधारमा हामी थप धारणा बनाउनेछौं ।’
