काठमाडौँ । सौर्य एयरलाइन्सको जहाज विमानस्थलबाट उड्नबित्तिकै दाहिनेतिर मोडिन गई दुर्घटनाग्रस्त भएको नेपाल नागरिक उड्ययन प्राधिकरणले जनाएको छ ।
बुधबार बिहान ११ बजेर ११ मिनेट जाँदा त्रिभुवन अन्तर्राष्ट्रिय विमानस्थलबाट पोखराका लागि उडेको सौर्यको सीआरजे ७ (रजिस्ट्रेसन–९एनएएमई) जहाज दुर्घटना भएको थियो ।
जहाज उड्नेबित्तिकै दाहिनेतिर मोडिन गई रनवेको पूर्वतिर रहेको स्थानमा दुर्घटना ग्रस्त हुन पुगेको प्राधिकरणको खोज तथा उद्धार समन्वय केन्द्रले विज्ञप्तिमा उल्लेख गरेको छ । दुर्घटनापछि जहाजमा आगो लागेको र सो क्रममा १८ जना यात्रुको मृत्यु भएको प्राधिकरणले जनाएको छ ।
यस्तै, पाइलट मनिषरत्न शाक्य घाइते रहेको र उपचारका लागि उनलाई काठमाडौँ मेडिकल कलेज पठाइएको प्राधिकरणले जनाएको छ । को–पाइलट सुशान्त कटुवालको भने मृत्यु भएको छ ।
विमानमा सवार कर्मचारीहरू अमित मान महर्जन, सागर आचार्य, दीलिप वर्मा, मनुराज शर्मा, अश्विन निरौला, सुदीप लाल जोशी, सर्वेश मरासिनी, श्याम विन्दुकार, नवराज आले,राजाराम आचार्य, प्रिजा खतिवडा, अधिराज शर्मा, उद्धव पुरी, यज्ञ प्रसाद पौडेल, सन्तोष महतो, पुन्यरत्न शाही र आरिफ रेडा ( यमनका नागरिक) को मृत्यु भएको छ ।
