जुरिच । बायर्न म्युनिकका फरवार्ड रोबर्ट लेवनडोस्की बिहीबार फिफाको उत्कृष्ट पुरुष खेलाडी २०२० घोषित भएका छन् । यसको होडमा उनले गत वर्षका विजेता लियोनल मेसी र क्रिस्टियानो रोनाल्डोलाई उछिनेका हुन् । बायर्नका लागि उनले जर्मन लिग र कपसँगै युरोपेली च्याम्पियन्स लिग जितेका थिए । यी तीनै प्रतियोगितामा उनी सर्वाधिक गोलकर्ता पनि रहे । लेवनडोस्कीले यो अवार्ड जितेको यो पहिलो पल्ट हो ।
आफ्नो सफलतामा खुसी लेवनडोस्कीले भनेका छन्, ‘म निकै खुसी र गर्व महसुस गरिरहेको छुं । मेसी र रोनाल्डोलाई उछिनेर वर्षको उत्कृष्ट खेलाडी हुनुको खास अर्थ छ । आजको दिन मेरो लागि विशेष रहनेछ ।’
महिलातर्फ म्यानचेस्टर सिटीका फुलब्याक लुसी ब्रोन्ज उत्कृष्ट खेलाडी बनिन् । यस्तै लिभरपुलका योर्गन क्लोप वर्षको उत्कृष्ट प्रशिक्षक चुनिए । उनले लगातार दोस्रो वर्ष यो अवार्ड जिते । उनको नेतृत्वमा लिभरपुलले ३० वर्षयता पहिलो पल्ट लिग उपाधि जितेको थियो ।
